മോശം പ്രകടനം, ക്രിസ്റ്റ്യാനോയുടെ ആത്മാർത്ഥയെ ചോദ്യം ചെയ്ത് ആരാധകർ!

സിരി എയിൽ അവസാനമായി കളിച്ച മൂന്ന് മത്സരങ്ങളിൽ ഒന്നിൽ മാത്രമാണ് നിലവിലെ ചാമ്പ്യൻമാരായ യുവന്റസിന് വിജയിക്കാൻ കഴിഞ്ഞത്. അവസാനമത്സരത്തിൽ ഫിയോറെന്റിനയോട് അവർ സമനില വഴങ്ങുകയായിരുന്നു. ഈ മൂന്ന് മത്സരത്തിലും ഗോൾ നേടാൻ സൂപ്പർ താരം ക്രിസ്റ്റ്യാനോ റൊണാൾഡോക്ക് സാധിച്ചിരുന്നില്ല. ഈ സീസണിൽ മികച്ച രൂപത്തിൽ തന്നെയാണ് ക്രിസ്റ്റ്യാനോ കളിക്കുന്നത്.39 മത്സരങ്ങളിൽ നിന്ന് 32 ഗോളുകൾ താരം ഈ സീസണിൽ നേടിയിരുന്നു. പക്ഷെ കഴിഞ്ഞ മത്സരങ്ങളിലൊക്കെ താരം സുവർണ്ണാവസരങ്ങൾ പാഴാക്കിയത് ആരാധകരെ ചൊടിപ്പിച്ചിരുന്നു. ഇതിനെ തുടർന്ന് ആരാധകർ താരത്തിന്റെ ആത്മാർത്ഥയെ ചോദ്യം ചെയ്തു തുടങ്ങിയിരിക്കുകയാണിപ്പോൾ. സോഷ്യൽ മീഡിയ പ്ലാറ്റ്ഫോമുകളിലാണ് ആരാധകർ ക്രിസ്റ്റ്യാനോയെ വിമർശിക്കുന്നത്. സ്പാനിഷ് മാധ്യമമായ എഎസ് ഇക്കാര്യം റിപ്പോർട്ട്‌ ചെയ്തിട്ടുമുണ്ട്.

ചാമ്പ്യൻസ് ലീഗിൽ നിന്നും യുവന്റസ് പുറത്തായതിന് പിന്നാലെ ക്രിസ്റ്റ്യാനോ ഈ സീസണോട് കൂടി യുവന്റസ് വിടുമെന്ന വാർത്തകൾ പരന്നിരുന്നു. റയൽ, പിഎസ്ജി, മാഞ്ചസ്റ്റർ യുണൈറ്റഡ് എന്നിവരെ ബന്ധപ്പെടുത്തി കൊണ്ടായിരുന്നു വാർത്തകൾ. അതിന് ശേഷം ക്രിസ്റ്റ്യാനോക്ക് യുവന്റസിനോടുള്ള ആത്മാർത്ഥ കുറഞ്ഞു എന്നാണ് ആരാധകരുടെ ആരോപണം. ഗോൾനേടാനുള്ള അവസരങ്ങൾ ഉപയോഗപ്പെടുത്താതാണ് ആരാധകരെ രോഷം പിടിപ്പിക്കുന്നത്. മാത്രമല്ല കഴിഞ്ഞ 9 വർഷമായി ലഭിക്കുന്ന സിരി എ കിരീടം ഇത്തവണ നഷ്ടപ്പെടുകയാണ്. ഇതിന്റെ ദേഷ്യവും ആരാധകർക്കിടയിലുണ്ട്. കഴിഞ്ഞ ഫിയോറെന്റിനക്കെതിരെയുള്ള മത്സരശേഷം മുൻ ഇറ്റാലിയൻ സ്‌ട്രൈക്കർ ലുക്കാ ടോണി ക്രിസ്റ്റ്യാനോയെ വിമർശിച്ചിരുന്നു. ” മോശം പ്രകടനമായിരുന്നു റൊണാൾഡോ നടത്തിയത്.അദ്ദേഹത്തിന് അവസരങ്ങൾ ലഭിച്ചിട്ട് പോലും അദ്ദേഹത്തിന് മുതലെടുക്കാനായില്ല.10-ൽ നാലാണ് ഞാൻ അദ്ദേഹത്തിന്റെ പ്രകടനത്തിന് നൽകുന്ന റേറ്റിംഗ് ” ഇതായിരുന്നു അദ്ദേഹം പറഞ്ഞിരുന്നത്. ഏതായാലും റൊണാൾഡോ ഈ സീസണോട് കൂടി യുവന്റസ് വിടാനുള്ള സാധ്യത കൂടുതലാണ്. എങ്ങോട്ട് ചേക്കേറുമെന്ന കാര്യത്തിലാണ് ഇപ്പോഴും അനിശ്ചിതത്വം നിലനിൽക്കുന്നത്.