ദിബാലയെ കൊടുത്ത് നെയ്മറെ വാങ്ങാൻ യുവന്റസ്?

സൂപ്പർ താരം നെയ്മർ ജൂനിയർ ബാഴ്സയിലേക്ക് തിരികെ പോവുന്നു എന്ന അഭ്യൂഹങ്ങൾക്കിടെ വഴിത്തിരിവ് സൃഷ്ടിച്ച് മറ്റൊരു വാർത്ത. ഇറ്റാലിയൻ മാധ്യമമായ സെവൻ ഗോൾഡാണ് വലിയൊരു ചർച്ചക്ക് വഴിതെളിയിച്ചു കൊണ്ട് പുതിയ വാർത്ത പുറത്തുവിട്ടിരിക്കുന്നത്. പിഎസ്ജിയുടെ സൂപ്പർ താരം നെയ്മർ ജൂനിയറെ ടീമിലെത്തിക്കാൻ യുവന്റസ് ശ്രമിക്കുന്നതായും പകരം പിഎസ്ജിക്ക് തങ്ങളുടെ സൂപ്പർ താരമായ ദിബാലയെ കൈമാറുമെന്നുമാണ് ഇവർ പുറത്തുവിട്ടിരിക്കുന്നത്. വരുന്ന സീസണുകളിൽ ചാമ്പ്യൻസ് ലീഗ് നേടണമെങ്കിൽ ക്രിസ്റ്റ്യാനോക്കൊപ്പം ശക്തനായ ഒരു താരത്തെ ആവിശ്യമുണ്ടെന്നും നെയ്മർക്ക് അതിന് സാധിക്കുമെന്നുമാണ് ഇവർ റിപ്പോർട്ട്‌ ചെയ്തിരിക്കുന്നത്. ബീയിങ് സ്പോർട്സ്, മാർക്ക ഉൾപ്പെടുന്ന പ്രമുഖമാധ്യമങ്ങൾ ഇത് ഏറ്റെടുത്തതോടെ ഇത് ഫുട്ബോൾ ലോകത്ത് വലിയ ചർച്ചകൾക്ക് വഴിവെച്ചിരിക്കുകയാണ്.

നിലവിൽ നെയ്മർ ബാഴ്സയിലേക്ക് തിരികെ വരാൻ ശ്രമങ്ങൾ ഒക്കെ നടത്തുന്നുണ്ടെങ്കിലും അത് നടക്കാനുള്ള സാധ്യത വളരെ വിരളമാണ്. സാമ്പത്തികപ്രതിസന്ധി അനുഭവിക്കുന്ന ബാഴ്സ ഈയൊരു അവസ്ഥയിൽ നെയ്മറെ സൈൻ ചെയ്തേക്കില്ല. മാത്രമല്ല ലൗറ്ററോ മാർട്ടിനെസിനെയും പ്യാനിക്കിനെയും ക്യാമ്പ് നൗവിൽ എത്തിക്കാൻ ബാഴ്സ ചരടുവലികൾ തുടങ്ങുകയും ചെയ്തിട്ടുണ്ട്. നെയ്മർക്കാണെൽ പിഎസ്ജി വിടാനുള്ള ആഗ്രഹവും അതിനുള്ള സമ്മതവും ലഭിച്ചിട്ടുണ്ട്. ഈയൊരു അവസ്ഥയിൽ നെയ്മറെ സ്വന്തമാക്കാൻ യുവന്റസിന് കഴിയുമെന്നാണ് ഇവർ റിപ്പോർട്ട്‌ ചെയ്യുന്നത്. സൂപ്പർ താരം ദിബാലയെ പിഎസ്ജിക്ക് കൈമാറ്റം നടത്തി ബാക്കി പണമായി നൽകാനാണ് യുവന്റസ് ആലോചിക്കുന്നതെന്നും റിപ്പോർട്ട്‌ ചൂണ്ടിക്കാണിക്കുന്നുണ്ട്. ഏതായാലും ആധികാരികമായ ഉറവിടങ്ങൾ ഒന്നുമില്ലെങ്കിലും പ്രമുഖഫുട്ബോൾ മാധ്യമങ്ങൾ ഈ വാർത്ത റിപ്പോർട്ട്‌ ചെയ്തതോടെ ഇത് നടക്കുമോ എന്ന ആകാംക്ഷയിലാണ് ഫുട്ബോൾ ലോകം.