ഹാവെർട്സിന് ചെൽസിയിൽ തിളങ്ങാൻ കഴിയില്ല, മുന്നറിയിപ്പ് നൽകി മുൻ ജർമ്മൻ താരം !

ബയേർ ലെവർകൂസന്റെ യുവതാരം കായ് ഹാവെർട്സ് പ്രീമിയർ ലീഗ് വമ്പൻമാരായ ചെൽസിയിലേക്ക് കൂടുമാറാനുള്ള ഒരുക്കത്തിലാണ് ചെൽസിയും ബയേറും തമ്മിലുള്ള ചർച്ചകൾ അവസാനഘട്ടത്തിലാണ്. എന്നാലിപ്പോൾ ചെൽസിക്കും താരത്തിനും മുന്നറിയിപ്പുമായി രംഗത്ത് എത്തിയിരിക്കുകയാണ് മുൻ ജർമൻ താരം ലുക്കാസ് പെഡോൾസ്കി. ഇംഗ്ലീഷ് മാധ്യമമായ ദി സൺ ആണ് താരത്തിന്റെ വാക്കുകൾ റിപ്പോർട്ട്‌ ചെയ്തിരിക്കുന്നത്. ഹാവെർട്സിന് ചെൽസിയിൽ തിളങ്ങാൻ കഴിയില്ല എന്നാണ് ഇദ്ദേഹത്തിന്റെ വാദം. പ്രീമിയർ ലീഗിൽ കളിക്കാനാവിശ്യമായ ശാരീരികക്ഷമത താരത്തിന് ഇല്ല എന്നാണ് പെഡോൾസ്കി ഇതിന് കാരണമായി ചൂണ്ടികാണിക്കുന്നത്. എന്നാൽ ആർബി ലീപ്സിഗിൽ നിന്നും ചെൽസിയിലേക്ക് കൂടുമാറിയ മറ്റൊരു ജർമ്മൻ താരം ടിമോ വെർണർക്ക് ഫോം തുടരാനാവുമെന്നും അദ്ദേഹം അറിയിച്ചു.

” വളരെയധികം പ്രതിഭയുള്ള താരമാണ് ഹാവെർട്സ്. പന്ത് കൈവശം ലഭിച്ചാൽ വളരെയധികം ക്രീയേറ്റീവ് ആയി ചിന്തിക്കുന്ന ഒരാൾ. പക്ഷെ അദ്ദേഹമിപ്പോഴും ചെറുപ്പമാണ്. പ്രീമിയർ ലീഗ് അദ്ദേഹത്തിന് അനുയോജ്യമാവുമോ എന്ന് കാത്തിരുന്നു കാണേണ്ടിയിരിക്കുന്നു. എന്റെ കാഴ്ച്ചപ്പാടിൽ അദ്ദേഹത്തിന് ഇപ്പോഴും കരുത്തിന്റെയും ശാരീരികക്ഷമതയുടെയും അഭാവമുണ്ട്. പക്ഷെ അദ്ദേഹത്തിന് പ്രീമിയർ ലീഗ് ഇഷ്ടം ആണെങ്കിൽ താരത്തിന് അത് രുചിച്ചു നോക്കാം. ഞാൻ പ്രീമിയർ ലീഗിൽ കളിച്ചിരുന്നു. ഞാൻ അതിനെ ഇഷ്ടപ്പെടുകയും ചെയ്തിരുന്നു. തീർച്ചയായും ഞാൻ കരുത്തനും നല്ല ഷോട്ടുകൾ തൊടുക്കാൻ പ്രാപ്തനുമായിരുന്നു. തെരുവിൽ നിന്നാണ് ഞാൻ വന്നത്. പ്രീമിയർ ലീഗിലെ ലോങ്ങ്‌ ബോളുകളെയും ശാരീരികമായുള്ള വെല്ലുവിളികളെയും എങ്ങനെ നേരിടണമെന്ന് എനിക്കറിയാമായിരുന്നു ” പെഡോൾസ്കി പറഞ്ഞു. താരം ആഴ്‌സണലിന് വേണ്ടി കളിച്ചിട്ടുണ്ട്.