ഹാരി കെയ്ൻ ചാന്റുമായി മാഞ്ചസ്റ്റർ യുണൈറ്റഡ് ആരാധകർ!

ഇന്നലെ ഇംഗ്ലീഷ് പ്രീമിയർ ലീഗിൽ നടന്ന മാഞ്ചസ്റ്റർ യുണൈറ്റഡും ടോട്ടൻഹാം ഹോട്സ്പറും തമ്മിലുള്ള മത്സരം സമനിലയിലായിരുന്നു അവസാനച്ചിരുന്നത്. രണ്ട് ടീമുകളും രണ്ട് ഗോളുകൾ വീതം നേടുകയായിരുന്നു. മത്സരത്തിന്റെ ആദ്യ പകുതിയിൽ തന്നെ രണ്ട് ഗോളുകളുടെ ലീഡ് യുണൈറ്റഡ് നേടിയിരുന്നുവെങ്കിലും രണ്ടാം പകുതിയിൽ ടോട്ടൻഹാം തിരിച്ചടിക്കുകയായിരുന്നു.

കഴിഞ്ഞ ട്രാൻസ്ഫർ ജാലകത്തിലായിരുന്നു സൂപ്പർ താരം ക്രിസ്റ്റ്യാനോ റൊണാൾഡോ മാഞ്ചസ്റ്റർ യുണൈറ്റഡ് വിട്ടത്. ആ സ്ഥാനത്തേക്ക് അനുയോജ്യമായ ഒരു പകരക്കാരനെ കൊണ്ടുവരാൻ ഇതുവരെ മാഞ്ചസ്റ്റർ യുണൈറ്റഡിന് കഴിഞ്ഞിട്ടില്ല. അതുകൊണ്ടുതന്നെ വരുന്ന സമ്മർ ട്രാൻസ്ഫർ വിൻഡോയിൽ ഒരു മികച്ച സ്ട്രൈക്കറെ മാഞ്ചസ്റ്റർ യുണൈറ്റഡിന് ആവശ്യമാണ്.ടോട്ടൻഹാമിന്റെ സൂപ്പർ സ്ട്രൈക്കറായ ഹാരി കെയ്നിനെ വളരെ ഗൗരവത്തോടുകൂടി തന്നെ മാഞ്ചസ്റ്റർ യുണൈറ്റഡ് പരിഗണിക്കുന്നുണ്ട്.

ഇന്നലത്തെ മത്സരത്തിനിടെ ഒരു ട്രോൾ എന്ന രൂപേണ ഹാരി കെയ്ൻ ചാന്റ് യുണൈറ്റഡ് ആരാധകർ പാടിയിട്ടുണ്ട്.’ഹാരി കെയ്ൻ.. നമുക്ക് ജൂണിൽ കാണാം ‘ എന്നാണ് യുണൈറ്റഡ് ആരാധകർ ചാന്റ് ചെയ്തിട്ടുള്ളത്.ഈ സീസണിന് ശേഷം കെയ്നിനെ സ്വന്തമാക്കും എന്ന് തന്നെയാണ് യുണൈറ്റഡ് ആരാധകർ പ്രഖ്യാപിക്കുന്നത്.

ക്ലബ്ബിന് വേണ്ടി മികച്ച പ്രകടനം സ്ഥിരമായി നടത്തുമ്പോഴും ഒരൊറ്റ കിരീടം പോലും സ്വന്തമാക്കാൻ കെയ്നിന് കഴിഞ്ഞിട്ടില്ല. അതുകൊണ്ടുതന്നെ നേരത്തെ മാഞ്ചസ്റ്റർ സിറ്റിയിലേക്ക് പോകാനുള്ള ശ്രമം ഈ സ്ട്രൈക്കർ നടത്തിയെങ്കിലും ടോട്ടൻഹാം നിരസിക്കുകയായിരുന്നു. കെയ്ൻ ഇത്തവണ യുണൈറ്റഡിലേക്ക് പോകാൻ ശ്രമിച്ചാലും അത് എളുപ്പമാവില്ല. 100 മില്യൺ പൗണ്ട് ആണ് താരത്തിന്റെ വിലയായി ടോട്ടൻഹാം കണ്ടുവെച്ചിരിക്കുന്നത്. ഏതായാലും കിരീടങ്ങൾ ലക്ഷ്യമിട്ടുകൊണ്ടാണ് കെയ്ൻ ഇപ്പോൾ ക്ലബ്ബ് വിടാൻ ഉദ്ദേശിക്കുന്നത്.