സൗദി അറേബ്യയിലേക്കോ? റൂമറുകളോട് പ്രതികരിച്ച് ബ്രൂണോ!

സമീപകാലത്ത് നിരവധി സൂപ്പർതാരങ്ങളെ സ്വന്തമാക്കാൻ സൗദി അറേബ്യക്ക് സാധിച്ചിരുന്നു. റൊണാൾഡോയും ബെൻസിമയും നെയ്മറുമെല്ലാം ഇന്നിപ്പോൾ സൗദി അറേബ്യയുടെ താരങ്ങളാണ്. അതുകൊണ്ടുതന്നെ സൗദിയുമായി ബന്ധപ്പെട്ട റൂമറുകൾ ഒരിക്കലും തള്ളിക്കളയാനാവില്ല. കാരണം അത്രയും വിദഗ്ധമായി കൊണ്ടാണ് അവർ കാര്യങ്ങളെ മുന്നോട്ടു കൊണ്ടുപോകുന്നത്.

ഏറ്റവും പുതിയ റിപ്പോർട്ട് മാഞ്ചസ്റ്റർ യുണൈറ്റഡിന്റെ പോർച്ചുഗീസ് സൂപ്പർ താരമായ ബ്രൂണോ ഫെർണാണ്ടസിന് വേണ്ടി സൗദി ശ്രമങ്ങൾ നടത്തുന്നു എന്നതായിരുന്നു. എന്നാൽ ഈ റൂമറുകളെ ബ്രൂണോ തന്നെ തള്ളിക്കളഞ്ഞിട്ടുണ്ട്. ഈ റൂമറുകൾ താൻ ശ്രദ്ധിക്കുന്നില്ലെന്നും യുണൈറ്റഡിൽ മാത്രമാണ് തന്റെ ശ്രദ്ധയെന്നും ബ്രൂണോ പറഞ്ഞിട്ടുണ്ട്.അദ്ദേഹത്തിന്റെ വാക്കുകൾ ഇങ്ങനെയാണ്.

“ഞാൻ എവിടെയാണോ ഉള്ളത് അവിടെ ഞാൻ ഹാപ്പിയാണ്. ഞാൻ മാഞ്ചസ്റ്റർ യുണൈറ്റഡിൽ മാത്രമാണ് ഫോക്കസ് ചെയ്തിരിക്കുന്നത്. ഞാൻ റൂമറുകൾ നോക്കാറില്ല. അതിന് ശ്രദ്ധ നൽകാറുമില്ല.മാധ്യമങ്ങളിലൂടെ റൂമറുകൾ പ്രചരിപ്പിക്കുക എന്നത് ഇന്ന് വളരെ എളുപ്പമുള്ള കാര്യമാണ്.പക്ഷേ എന്റെ ലക്ഷ്യങ്ങളിൽ ശ്രദ്ധ കേന്ദ്രീകരിക്കുന്നതിനാണ് ഞാൻ മുൻഗണന നൽകുന്നത് ” ബ്രൂണോ പറഞ്ഞു.

പോർച്ചുഗലിന് വേണ്ടിയുള്ള കഴിഞ്ഞ മത്സരത്തിൽ ഗോൾ നേടാൻ ബ്രൂണോക്ക് സാധിച്ചിരുന്നു. മാഞ്ചസ്റ്റർ യുണൈറ്റഡിൽ വന്ന സമയത്ത് തകർപ്പൻ പ്രകടനമായിരുന്നു ഈ താരം നടത്തിയിരുന്നത്.എന്നാലിപ്പോൾ ആ നിലവാരം പുലർത്താൻ താരത്തിന് കഴിയുന്നില്ല. ഈ പ്രീമിയർ ലീഗിൽ മൂന്ന് ഗോളുകളും രണ്ട് അസിസ്റ്റുകളുമാണ് താരം സ്വന്തമാക്കിയിട്ടുള്ളത്.