സൂപ്പർ താരങ്ങൾ ഗോളടിച്ചു, ആഴ്സണലിനെ കീഴടക്കി ചെൽസി!

പ്രീ സീസൺ സൗഹൃദമത്സരത്തിൽ രണ്ടാം ജയം നേടി നിലവിലെ ചാമ്പ്യൻസ് ലീഗ് ചാമ്പ്യൻമാരായ ചെൽസി. ഒന്നിനെതിരെ രണ്ട് ഗോളുകൾക്ക്‌ കരുത്തരായ ആഴ്സണലിനെയാണ് ചെൽസി കീഴടക്കിയത്. സൂപ്പർ താരങ്ങളായ കായ്‌ ഹാവെർട്സ്, ടാമി അബ്രഹാം എന്നിവരാണ് ചെൽസിയുടെ ഗോളുകൾ നേടിയത്. ആഴ്സണലിന്റെ ഏക ഗോൾ ഷാക്കയുടെ വകയായിരുന്നു.ഇതിന് മുമ്പത്തെ മത്സരത്തിൽ ബേൺമൗത്തിനെ ചെൽസി ഇതേ സ്കോറിന് കീഴടക്കിയിരുന്നു.ഇനി കരുത്തരായ ടോട്ടൻഹാമിനെതിരെയാണ് ചെൽസി സൗഹൃദമത്സരം കളിക്കുക.

വെർണർ, ഹാവെർട്സ്, സിയെച്ച്, പുലിസിച്ച് എന്നിവരൊക്കെ ചെൽസിയുടെ സ്റ്റാർട്ടിങ് ഇലവനിൽ ഇടം നേടിയിരുന്നു. മറുഭാഗത്ത് ലാക്കസാട്ടെ, ഒബമയാങ് എന്നിവരും ഉൾപ്പെട്ടിരുന്നു.മത്സരത്തിന്റെ 27-ആം മിനുട്ടിലാണ് ചെൽസി ലീഡ് നേടുന്നത്.ഹാവെർട്സാണ് ചെൽസിക്ക്‌ വേണ്ടി വല കുലുക്കിയത്.എന്നാൽ 69-ആം മിനുട്ടിൽ ഷാക്ക ഇതിന് മറുപടി നൽകിയതോടെ മത്സരം സമനിലയായി.പക്ഷേ മൂന്ന് മിനുട്ടുകൾക്കകം ടാമി അബ്രഹാം ചെൽസിക്ക്‌ വിജയഗോൾ നേടികൊടുക്കുകയായിരുന്നു.ആഴ്സണലിനെ സംബന്ധിച്ചിടത്തോളം പ്രീ സീസൺ ഒട്ടും ആശാവഹമല്ല. മൂന്ന് മത്സരങ്ങളിൽ ഒന്നിൽ പോലും വിജയിക്കാൻ ഗണ്ണേഴ്‌സിന് സാധിച്ചിട്ടില്ല. രണ്ടെണ്ണത്തിൽ പരാജയപ്പെട്ടപ്പോൾ ഒന്നിൽ സമനിലയിൽ കുരുങ്ങി.