റയൽ യുവതാരത്തിന് വേണ്ടി ന്യൂകാസിലും രംഗത്ത്
റയൽ മാഡ്രിഡിന്റെ യുവസ്ട്രൈക്കെർ ലുക്കാ ജോവിച്ചിന് വേണ്ടി രംഗത്ത് വന്നു പ്രീമിയർ ലീഗ് ടീമായ ന്യൂകാസിൽ യുണൈറ്റഡ്. കഴിഞ്ഞ ദിവസം കാൽസിയോ മെർകാറ്റൊ.കോം എന്ന മാധ്യമമാണ് ഇക്കാര്യം റിപ്പോർട്ട്‌ ചെയ്തിരിക്കുന്നത്. താരത്തിന് വേണ്ടി ആഴ്‌സണൽ, മിലാൻ എന്നീ വമ്പൻ ടീമുകൾ രംഗത്തുള്ളപ്പോഴാണ് ന്യൂകാസിൽ യുണൈറ്റഡ് അവർക്ക് വെല്ലുവിളിയുമായി രംഗത്ത് വന്നിട്ടുള്ളത്. കഴിഞ്ഞ സമ്മറിൽ അറുപത് മില്യൺ യുറോക്ക് റയലിൽ എത്തിയ താരമാണ് ജോവിച്. ടീമിൽ തിളങ്ങാനാവാതെ വന്നതോടെ ടീം വിടാൻ താരം താല്പര്യം പ്രകടിപ്പിച്ചിരുന്നു.
നിലവിൽ എസി മിലാനാണ് താരത്തിന് വേണ്ടി ഏറ്റവും ശക്തമായി രംഗത്തുള്ളത്. താരത്തിന്റെ ഏജന്റുമായി എസി മിലാൻ അധികൃതർ സംസാരിച്ചതായാണ് റിപ്പോർട്ടുകൾ. 35 മില്യൺ യുറോ വരെ താരത്തിന് വേണ്ടി ചിലവഴിക്കാൻ അവർ തയ്യാറാണ്. ഇബ്രാഹിമോവിച്ചിന്റെ പകരക്കാരനായാണ് താരത്തെ മിലാൻ കണ്ടുവെച്ചിട്ടുള്ളത്. അതേ സമയം ഇപിഎൽ വമ്പൻമാരായ ആഴ്‌സണലും താരത്തിൽ നോട്ടമിട്ട് വെച്ചിട്ടുണ്ട്. ഏതായാലും താരത്തെ വിൽക്കുമോ എന്ന കാര്യത്തിൽ ഒരു അന്തിമതീരുമാനം ഇത് വരെ റയലിന്റെ ഭാഗത്തു നിന്നുണ്ടായിട്ടില്ല.
