യുണൈറ്റഡിന്റെ സൂപ്പർ താരം ലാലിഗ വമ്പൻമാരുമായി കരാറിലെത്തി!

മാഞ്ചസ്റ്റർ യുണൈറ്റഡിന്റെ ഉറുഗ്വൻ സൂപ്പർ താരമായ എഡിൻസൺ കവാനിയുടെ ക്ലബ്ബുമായുള്ള കരാർ കഴിഞ്ഞ മാസത്തോടുകൂടി അവസാനിച്ചിരുന്നു. പുതിയ ഒരു ക്ലബ്ബിന് വേണ്ടിയുള്ള അന്വേഷണത്തിലായിരുന്നു താരം ഇതുവരെ ഉണ്ടായിരുന്നത്. ഇപ്പോഴിതാ ലാലിഗ വമ്പൻമാരായ വിയ്യാറയലുമായി കവാനി വെർബൽ എഗ്രിമെന്റിൽ എത്തിക്കഴിഞ്ഞു എന്നുള്ള റിപ്പോർട്ടുകളാണ് പുറത്തേക്ക് വന്നിട്ടുള്ളത്. സ്പാനിഷ് മാധ്യമങ്ങളായ മാർക്ക,ഡയാരിയോ As എന്നിവരാണ് ഇക്കാര്യം റിപ്പോർട്ട് ചെയ്തിട്ടുള്ളത്.

മുമ്പ് ഫ്രഞ്ച് വമ്പൻമാരായ പിഎസ്ജിക്ക് ദീർഘകാലം കളിച്ചിട്ടുള്ള താരമാണ് കവാനി. അന്ന് പിഎസ്ജിയിൽ കവാനിയെ പരിശീലിപ്പിച്ചിരുന്ന ഉനൈ എംരി നിലവിൽ വിയ്യാറയലിന്റെ പരിശീലകനാണ്.അദ്ദേഹമാണ് താരത്തെ ക്ലബ്ബിൽ എത്തിക്കാൻ താല്പര്യപ്പെടുന്നത്.എന്നാൽ കവാനിയെ ഒഫീഷ്യലായി സൈൻ ചെയ്യണമെങ്കിൽ ക്ലബ്ബിന് മുന്നിൽ ചില സങ്കീർണതകളുണ്ട്. ഏതെങ്കിലും ഒരു സ്ട്രൈക്കറെ കൈവിട്ടാൽ മാത്രമേ കവാനിയെ എത്തിക്കാൻ സാധിക്കുകയുള്ളൂ. സൂപ്പർ താരം പാക്കോ അൽകസർ ക്ലബ്ബ് വിടാനുള്ള സാധ്യതകളാണ് ഇവിടെ തെളിഞ്ഞു കാണുന്നത്.

2020 ലായിരുന്നു കവാനി പിഎസ്ജി വിട്ടു കൊണ്ട് മാഞ്ചസ്റ്റർ യുണൈറ്റഡിൽ എത്തിയത്. ആദ്യ സീസണിൽ തകർപ്പൻ പ്രകടനമായിരുന്നു താരം പുറത്തെടുത്തത്. എന്നാൽ കഴിഞ്ഞ സീസണിൽ മികവിലേക്ക് ഉയരാൻ കവാനിക്ക് സാധിക്കാതെ പോവുകയായിരുന്നു. ആകെ കളിച്ച 20 മത്സരങ്ങളിൽ നിന്ന് കേവലം രണ്ടു ഗോളുകൾ മാത്രമാണ് കവാനിക്ക് നേടാൻ കഴിഞ്ഞത്. ഇതോടെ യുണൈറ്റഡ് താരത്തിന്റെ കരാർ പുതുക്കാൻ തയ്യാറായിരുന്നില്ല.

35-കാരനായ താരം ലീഗ് വൺ,സിരി എ,പ്രീമിയർ ലീഗ് എന്നിവിടങ്ങളിൽ ഇതുവരെ കളിച്ചിട്ടുണ്ട്.എന്നാൽ ഇതുവരെ ലാലിഗയിൽ കളിച്ചിട്ടില്ല. ഏതായാലും ഒഫീഷ്യലായി കൊണ്ട് തന്നെ ടീമിലേക്ക് എത്തിക്കാനുള്ള ശ്രമങ്ങളിലാണ് നിലവിൽ ഉനൈ എംരിയുള്ളത്.