മെസ്സിയോ ക്രിസ്റ്റ്യാനോയോ? ഗ്രീൻവുഡ് പറയുന്നു!

ഫുട്ബോൾ ലോകത്തെ ഏറ്റവും വലിയ ചിരവൈരികളിലൊന്നാണ് മെസ്സിയും ക്രിസ്റ്റ്യാനോ റൊണാൾഡോയുമെന്ന കാര്യത്തിൽ ആർക്കും സംശയം കാണില്ല. ആരാണ് മികച്ചതെന്ന ചോദ്യം ഫുട്ബോൾ ലോകത്ത് എന്നും ചർച്ചാവിഷയമാണ്. ഏതായാലും ഓരോ വ്യക്തികളും തങ്ങളുടേതായ അഭിപ്രായം ഈ വിഷയത്തിലുണ്ടാവും. ഇപ്പോഴിതാ ഈ രണ്ട് താരങ്ങളിൽ ഒരാളെ തിരഞ്ഞെടുത്തിരിക്കുകയാണ് മാഞ്ചസ്റ്റർ യുണൈറ്റഡിന്റെ യുവതാരമായ മാസോൺ ഗ്രീൻവുഡ്.ക്രിസ്റ്റ്യാനോ റൊണാൾഡോയേക്കാൾ ഗ്രീൻവുഡ് ഇഷ്ടപ്പെടുന്നത് ലയണൽ മെസ്സിയെയാണ്.മാഞ്ചസ്റ്റർ യുണൈറ്റഡിന്റെ ഒഫീഷ്യൽ വെബ്സൈറ്റ് നടത്തിയ ചോദ്യോത്തരവേളയിലാണ് താരം ഇക്കാര്യം വെളിപ്പെടുത്തിയത്.

” ഞാൻ എപ്പോഴും മെസ്സിക്കാണ് മുൻഗണന നൽകുക.അദ്ദേഹം മറ്റൊരു ഗ്രഹത്തിൽ നിന്നും വന്ന താരമാണ്.തീർച്ചയായും റൊണാൾഡോ മികച്ച താരമാണ്.അദ്ദേഹത്തിന്റെ ശാരീരികക്ഷമത മികച്ചതാണ്.നല്ലൊരു അത്ലറ്റിക്ക് ഫുട്ബോളറാണ് റൊണാൾഡോ. പക്ഷേ മെസ്സി ചെയ്ത കാര്യങ്ങൾ വെച്ചു നോക്കുമ്പോൾ അദ്ദേഹം മറ്റൊരു ലെവലാണ്. ബാഴ്സക്കും അർജന്റീനക്കും വേണ്ടി അദ്ദേഹം ഒരുപാട് കാര്യങ്ങൾ ചെയ്തു നൽകിയിട്ടുണ്ട് ” ഇതാണ് ഗ്രീൻവുഡ് പറഞ്ഞത്.

അതേസമയം താൻ ഏറെ ഇഷ്ടപ്പെടുന്ന താരം റൊണാൾഡോ നസാരിയോയാണെന്നും ഗ്രീൻവുഡ് അറിയിച്ചിട്ടുണ്ട്. താരത്തെ അനുകരിക്കാൻ താൻ പലപ്പോഴും ശ്രമിക്കാറുണ്ടെന്നും താരം കൂട്ടിച്ചേർത്തു. ” എന്റെ ഇഷ്ടപ്പെട്ട സ്കിൽ മൂവ് സ്റ്റെപ്പോവറാണ്.ഞാൻ എന്നും അത് പരിശീലിക്കാറുണ്ട്.ഞാൻ ബ്രസീലിയൻ റൊണാൾഡോയുടെ വീഡിയോകൾ കാണാറുണ്ട്.അദ്ദേഹം എപ്പോഴും ഗോൾകീപ്പർമാരെയും ഡിഫൻഡർമാരെയും അത് വഴി കബളിപ്പിക്കുമായിരുന്നു.ഞാൻ അദ്ദേഹത്തെ അനുകരിക്കാൻ ശ്രമിക്കാറുമുണ്ട് ” ഗ്രീൻവുഡ് പറഞ്ഞു.പത്തൊൻപതുകാരനായ ഗ്രീൻവുഡ് ഭാവി വാഗ്ദാനമായാണ് വിലയിരുത്തപ്പെടുന്നത്.