മെസ്സിയുടെയും CR7ന്റേയും ലെവലിലാണ് സലാ: ലിവർപൂൾ കോച്ച്

കഴിഞ്ഞ പ്രീമിയർ ലീഗ് മത്സരത്തിൽ ഒന്നിനെതിരെ 2 ഗോളുകൾക്കായിരുന്നു ലിവർപൂൾ ബ്രൈറ്റണെ തോൽപ്പിച്ചിരുന്നത്. മത്സരത്തിൽ മുഹമ്മദ് സലാ നേടിയ ഗോളാണ് ലിവർപൂളിന് വിജയം സമ്മാനിച്ചത്. പതിവുപോലെ തകർപ്പൻ പ്രകടനമാണ് സലാ നടത്തിക്കൊണ്ടിരിക്കുന്നത്.10 മത്സരങ്ങളിൽ നിന്ന് 7 ഗോളുകളും 5 അസിസ്റ്റുകളും അദ്ദേഹം പ്രീമിയർ ലീഗിൽ സ്വന്തമാക്കിയിട്ടുണ്ട്.ചാമ്പ്യൻസ് ലീഗിൽ ഒരു ഗോളും രണ്ട് അസിസ്റ്റും അദ്ദേഹം നേടിയിട്ടുണ്ട്.

താരത്തെ പ്രശംസിച്ചുകൊണ്ട് ലിവർപൂളിന്റെ പരിശീലകനായ അർനെ സ്ലോട്ട് രംഗത്ത് വന്നിട്ടുണ്ട്.ക്രിസ്റ്റ്യാനോ റൊണാൾഡോ,ലയണൽ മെസ്സി എന്നിവരുടെ അതേ നിലവാരത്തിലുള്ള താരമാണ് സലാ എന്നാണ് സ്ലോട്ട് പറഞ്ഞിട്ടുള്ളത്. കണക്കുകൾ കൊണ്ടുമാത്രം അദ്ദേഹത്തെ വിലയിരുത്തരുത് എന്നും ഈ പരിശീലകൻ പറഞ്ഞിട്ടുണ്ട്.സ്ലോട്ടിന്റെ വാക്കുകൾ ഇങ്ങനെയാണ്.

“ക്രിസ്റ്റ്യാനോ റൊണാൾഡോ, ലയണൽ മെസ്സി എന്നിവർ ഉണ്ടാക്കിയ അതേ ഇമ്പാക്ട് ഉണ്ടാക്കാൻ മുഹമ്മദ് സലാക്ക് സാധിക്കുന്നുണ്ട്.അതേ നിലവാരത്തിലുള്ള താരമാണ് അദ്ദേഹം. അദ്ദേഹം അവരെക്കാൾ താഴെയാണ് എന്ന് ചിന്തിക്കാൻ തക്കവണ്ണമുള്ള യാതൊരുവിധ കാരണങ്ങളും ഇവിടെയില്ല.സലായെ അദ്ദേഹത്തിന്റെ കണക്കുകൾ മാത്രം വച്ച് വിലയിരുത്തരുത്. അദ്ദേഹം കളിക്കുന്നത് ഒന്ന് നോക്കണം “ഇതാണ് ലിവർപൂളിന്റെ പരിശീലകൻ പറഞ്ഞിട്ടുള്ളത്.

2017ൽ റോമയിൽ നിന്നായിരുന്നു സലാ ലിവർപൂളിൽ എത്തിയിരുന്നത്. അവർക്ക് വേണ്ടി 273 മത്സരങ്ങൾ കളിച്ച താരം 164 ഗോളുകൾ നേടിയിട്ടുണ്ട്. ഒരു പിടി കിരീടങ്ങളും സ്വന്തമാക്കിയിട്ടുണ്ട്. എന്നാൽ താരം ലിവർപൂൾ വിടാനുള്ള ഒരുക്കത്തിലാണ് എന്ന റൂമർ വളരെ വ്യാപകമാണ്.