മിണ്ടാതിരുന്ന് ക്രിസ്റ്റ്യാനോ പറയുന്നത് കേൾക്കൂ : യുവതാരങ്ങളോട് മുൻ യുണൈറ്റഡ് താരം

ഈയിടെയായിരുന്നു സൂപ്പർ താരം ക്രിസ്റ്റ്യാനോ റൊണാൾഡോ യുവതാരങ്ങൾക്കെതിരെ വിമർശനങ്ങൾ ഉന്നയിച്ചിരുന്നത്.അതായത് ഇപ്പോഴത്തെ യുവതാരങ്ങൾ വിമർശനങ്ങൾ അംഗീകരിക്കുന്നില്ലെന്നും ഉപദേശങ്ങൾ സ്വീകരിക്കുന്നില്ല എന്നുമായിരുന്നു റൊണാൾഡോയുടെ ആരോപണം.ഇത് വലിയ രൂപത്തിൽ ചർച്ചയാവുകയും ചെയ്തിരുന്നു.

എന്നാൽ ക്രിസ്റ്റ്യാനോ റൊണാൾഡോക്ക് പിന്തുണയുമായി കൊണ്ട് മുൻ യുണൈറ്റഡ് താരമായ ലൂയിസ് സാഹ രംഗത്ത് വന്നിട്ടുണ്ട്.അതായത് യുണൈറ്റഡിന്റെ ഡ്രസിങ് റൂമിൽ മനസിലുള്ളത് തുറന്ന് പറയാൻ അവകാശമുള്ള ഏകതാരം ക്രിസ്റ്റ്യാനോയാണ് എന്നാണ് ഇദ്ദേഹം പറഞ്ഞിരിക്കുന്നത്.യുവതാരങ്ങൾ മിണ്ടാതിരുന്നു കൊണ്ട് ക്രിസ്റ്റ്യാനോ പറയുന്നത് കേൾക്കണമെന്നും ഇദ്ദേഹം കൂട്ടിച്ചേർത്തിട്ടുണ്ട്.സാഹയുടെ വാക്കുകൾ മാഞ്ചസ്റ്റർ ഈവനിംഗ് ന്യൂസ് റിപ്പോർട്ട് ചെയ്യുന്നത് ഇങ്ങനെയാണ്.

” മനസിലുള്ളത് യുണൈറ്റഡിന്റെ ഡ്രസിങ് റൂമിൽ സംസാരിക്കാൻ അവകാശമുള്ള ഏക താരം ക്രിസ്റ്റ്യാനോ റൊണാൾഡോയാണ്.ഇവിടെയുള്ള യുവതാരങ്ങൾ ഒന്നുംതന്നെ തെളിക്കാത്തവരാണ്, രാജ്യത്തിനുവേണ്ടി വളരെക്കുറഞ്ഞ മത്സരങ്ങൾ കളിച്ചവരാണ്,കിരീടനേട്ടങ്ങൾ സ്വന്തമാക്കാത്തവരുമാണ്.നിങ്ങളുടെ ദൈവത്താൽ നിങ്ങൾ ഭയപ്പെട്ടില്ലെങ്കിൽ നിങ്ങൾക്ക് ഒരു ബഹുമാനവുമുണ്ടാവില്ല.യുവതാരങ്ങൾ ക്രിസ്റ്റ്യാനോയെ ദൈവമായി പരിഗണിക്കണമെന്ന് ഞാൻ പറയുന്നില്ല.പക്ഷേ ഫുട്ബോൾ ചരിത്രത്തിലെ ഏറ്റവും മികച്ച താരങ്ങളിൽ ഒരാളാണ് അദ്ദേഹം.നിങ്ങൾ വിമർശനങ്ങൾ സ്വീകരിക്കുന്നില്ലെങ്കിൽ അതൊരു സാധാരണമായ കാര്യമല്ല.കാരണം ക്രിസ്റ്റ്യാനോ നിങ്ങളെ ഇമ്പ്രൂവ് ആവാൻ വേണ്ടിയാണ് സഹായിക്കുന്നത്.അദ്ദേഹത്തിന് കിരീടങ്ങൾ നേടണം,അതെങ്ങനെ നേടാമെന്ന് ക്രിസ്റ്റ്യാനോക്ക് അറിയാം. അതുകൊണ്ടുതന്നെ താരങ്ങൾ നിർബന്ധമായും അദ്ദേഹം പറയുന്നത് കേൾക്കേണ്ടതുണ്ട്.ക്രിസ്റ്റ്യാനോയെ പോലെ ഒരു ജേതാവാകണോ എന്നുള്ളത് യുണൈറ്റഡ് താരങ്ങൾ സ്വയം ചോദിക്കേണ്ടതുണ്ട്.അങ്ങനെയാവണം എന്നുണ്ടെങ്കിൽ നിങ്ങൾ അദ്ദേഹത്തെ കേൾക്കണം.വളരെ വിനയത്തോട് കൂടി മിണ്ടാതിരുന്ന് കൊണ്ട് ഹാർഡ് വർക്ക് ചെയ്യണം ” സാഹ പറഞ്ഞു.

കഴിഞ്ഞ മത്സരത്തിൽ വിജയം നേടാൻ യുണൈറ്റഡിന് സാധിച്ചിരുന്നു.യുവതാരങ്ങളായ എലങ്ക,റാഷ്ഫോർഡ്,ഗ്രീൻവുഡ് എന്നിവരായിരുന്നു ഗോളുകൾ നേടിയിരുന്നത്.