ബെസ്റ്റ് പ്ലയെർ,ബെസ്റ്റ് എതിരാളി,ബെസ്റ്റ് ഗോൾ : വരാനെക്ക് പറയാനുള്ളത്!

നിലവിൽ പ്രീമിയർ ലീഗ് ക്ലബ്ബായ മാഞ്ചസ്റ്റർ യുണൈറ്റഡിനു വേണ്ടിയാണ് ഫ്രഞ്ച് സൂപ്പർതാരമായ റാഫേൽ വരാനേ കളിച്ചുകൊണ്ടിരിക്കുന്നത്. കഴിഞ്ഞ സീസണിലായിരുന്നു താരം റയൽ മാഡ്രിഡ് വിട്ടുകൊണ്ട് യുണൈറ്റഡിൽ എത്തിയത്. എന്നാൽ പരിക്കും മറ്റു പ്രശ്നങ്ങളുമായി താരത്തിന് കഴിഞ്ഞ സീസണിൽ വേണ്ട രൂപത്തിൽ തിളങ്ങാൻ കഴിഞ്ഞിരുന്നില്ല.

ഏതായാലും പ്രമുഖ ഫുട്ബോൾ മാധ്യമമായ ഗോളിന് ഈയിടെ താരം ഒരു അഭിമുഖം നൽകിയിരുന്നു. ഒപ്പം കളിച്ച ഏറ്റവും മികച്ച താരം, നേരിടേണ്ടി വന്ന ഏറ്റവും മികച്ച എതിരാളി, ഇതുവരെ കണ്ട ഏറ്റവും മികച്ച ഗോൾ ഏതൊക്കെയാണ് എന്നുള്ളത് വരാനെയോട് ചോദിക്കപ്പെട്ടിരുന്നു. അതിനുള്ള മറുപടി അദ്ദേഹം പറഞ്ഞത് ഇങ്ങനെയാണ്.

” ഞാൻ ഇതുവരെ നേരിട്ടതിൽ വെച്ച് ഏറ്റവും മികച്ച എതിരാളി ലയണൽ മെസ്സിയാണ്. അദ്ദേഹം വളരെയധികം വേഗത ഉള്ള താരമാണ്. വളരെ മികച്ച സ്ട്രൈക്കറാണ് അദ്ദേഹം. മാത്രമല്ല അദ്ദേഹത്തിന്റെ ഇടതുകാലിനെ കുറിച്ച് കൂടുതൽ പറയേണ്ട ആവശ്യമില്ലല്ലോ. വളരെ മികച്ച ഒരു താരം തന്നെയാണ് മെസ്സി. എന്നോടൊപ്പം കളിച്ചവരിൽ ഏറ്റവും മികച്ച താരം,അത് ക്രിസ്റ്റ്യാനോ റൊണാൾഡോയാണ്. ഞാൻ കണ്ടതിൽ വച്ച് ഏറ്റവും മികച്ച ഗോൾ ചാമ്പ്യൻസ് ലീഗ് ഫൈനലിൽ ഗാരെത് ബെയ്ൽ നേടിയ ഗോളാണ് ” ഇതാണ് വരാനെ പറഞ്ഞിട്ടുള്ളത്.

റയലിൽ ആയിരുന്ന സമയത്ത് എൽക്ലാസിക്കോ മത്സരങ്ങളിൽ ഒരുപാട് തവണ ലയണൽ മെസ്സിയെ വരാനെക്ക് നേരിടേണ്ടി വന്നിട്ടുണ്ട്. അതേസമയം റയൽ മാഡ്രിഡിലും മാഞ്ചസ്റ്റർ യുണൈറ്റഡിലും റൊണാൾഡോക്കൊപ്പം കളിക്കാൻ സാധിച്ചിട്ടുള്ള താരം കൂടിയാണ് വരാനെ. 2018ലെ ചാമ്പ്യൻസ് ലീഗ് ഫൈനലിൽ ലിവർപൂളിനെതിരെ ബെയ്ൽ ഒരു ബൈസിക്കിൾ കിക്ക് ഗോൾ നേടിയിരുന്നു.ആ ഗോളിനെയാണ് വരാനെ ഇപ്പോൾ പ്രശംസിച്ചിരിക്കുന്നത്.