ഫ്രഞ്ച് വമ്പൻമാരുമായി അഗ്രിമെന്റിൽ എത്തിയ താരത്തെ ഹൈജാക്ക് ചെയ്യാനുള്ള ശ്രമങ്ങളുമായി മാഞ്ചസ്റ്റർ യുണൈറ്റഡ്!

ഈ ട്രാൻസ്ഫർ ജാലകത്തിൽ മാഞ്ചസ്റ്റർ യുണൈറ്റഡ് പ്രധാനമായും ലക്ഷ്യം വെക്കുന്നത് രണ്ട് സൂപ്പർ താരങ്ങളെയാണ്.ആന്റണി,ഡി യോങ് എന്നിവർക്ക് വേണ്ടിയാണ് യുണൈറ്റഡ് ഇപ്പോൾ ശ്രമിച്ചുകൊണ്ടിരിക്കുന്നത്.ഫ്രങ്കി ഡി യോങ്ങിന് വേണ്ടിയുള്ള ശ്രമങ്ങൾ നല്ല രൂപത്തിലാണ് പുരോഗമിച്ചുകൊണ്ടിരിക്കുന്നത്.

ഫ്രങ്കി ഡി യോങ്ങിന്റെ അതേ ഏജന്റ് തന്നെയാണ് ഫെയെനൂർദിന്റെ ഡച്ച് താരമായ ടൈറൽ മലാസിയയുടെയും ഏജന്റ്. കഴിഞ്ഞ ദിവസം ടൈറൽ ഫ്രഞ്ച് ക്ലബ്ബായ ഒളിമ്പിക് ലിയോണുമായി വാക്കാലുള്ള എഗ്രിമെന്റിൽ എത്തിയിരുന്നു.എന്നാൽ ഇപ്പോഴിതാ ആ താരത്തെ ഹൈജാക്ക് ചെയ്യാനുള്ള ശ്രമങ്ങളാണ് നിലവിൽ മാഞ്ചസ്റ്റർ യുണൈറ്റഡ് നടത്തിക്കൊണ്ടിരിക്കുന്നത്. ഇക്കാര്യം റിപ്പോർട്ട് ചെയ്തിരിക്കുന്നത് ഫാബ്രിസിയോ റൊമാനോയാണ്.

2017 മുതൽ ഫെയെനൂർദിന്റെ സീനിയർ ടീമിന് വേണ്ടി കളിച്ചുകൊണ്ടിരിക്കുന്ന താരമാണ് ടൈറൽ.22- കാരനായ താരം ലെഫ്റ്റ് ബാക്ക് പൊസിഷനിലാണ് കളിച്ചു കൊണ്ടിരിക്കുന്നത്. കഴിഞ്ഞ ദിവസം ലിയോണുമായി അദ്ദേഹം വെർബൽ അഗ്രിമെന്റിൽ എത്തിയിരുന്നു.15 മില്യൺ യുറോ എന്ന ട്രാൻസ്ഫർ ഫീയായിരുന്നു അംഗീകരിച്ചിരുന്നത്. അഞ്ചുവർഷത്തെ കരാറിൽ ഒപ്പുവെക്കാൻ ധാരണയിൽ എത്തുകയും ചെയ്തിരുന്നു.

ഈയൊരു സമയത്താണ് യുണൈറ്റഡ് ഇപ്പോൾ പ്രവേശിച്ചിട്ടുള്ളത്.താരത്തെ ഇനി യുണൈറ്റഡിന് റാഞ്ചാൻ കഴിയുമോ എന്നുള്ളതാണ് ആരാധകർ ഉറ്റു നോക്കുന്ന കാര്യം.