പൗലോ ഡിബാലക്ക് വേണ്ടി പ്രീമിയർ ലീഗ് വമ്പൻമാർ രംഗത്ത്!

ഈ സീസണോട് കൂടിയാണ് യുവന്റസിന്റെ അർജന്റൈൻ സൂപ്പർ താരമായ പൗലോ ഡിബാലയുടെ ക്ലബ്ബുമായുള്ള കരാർ അവസാനിക്കുക.ഡിബാല ഇതുവരെ കരാർ പുതുക്കിയിട്ടില്ല.താരത്തിന് അനുയോജ്യമായ ഒരു ഓഫർ നേരത്തെ യുവന്റസ് നൽകിയിരുന്നെങ്കിലും അത് പിന്നീട് അവർ തന്നെ പിൻവലിക്കുകയായിരുന്നു.ഇതാണ് കരാർ പുതുക്കുന്നതിന് തടസ്സമായി നിലകൊള്ളുന്നത്.

പക്ഷെ കരാർ പുതുക്കാനുള്ള ശ്രമങ്ങൾ തുടരുമെന്ന് തന്നെയാണ് യുവന്റസ് സിഇഒയുടെ വാക്കുകളിൽ നിന്നും വ്യക്തമാവുന്നത്.ഇതുമായി ബന്ധപ്പെട്ടുകൊണ്ട് ഫെബ്രുവരിയിൽ ചർച്ച നടത്താമെന്നാണ് നിലവിൽ യുവന്റസ് പദ്ധതിയിട്ടിരിക്കുന്നത്.അതിന് വേണ്ടിയാണ് ദിബാല ഇപ്പോൾ കാത്തിരിക്കുന്നതും.

എന്നാൽ താരത്തെ ലക്ഷ്യമിട്ടുകൊണ്ട് പ്രീമിയർലീഗ് വമ്പന്മാരായ ലിവർപൂൾ ഇപ്പോൾ രംഗത്ത് വന്നിട്ടുണ്ട്.പ്രമുഖ ഇറ്റാലിയൻ മാധ്യമമായ ട്യൂട്ടോമെർക്കാറ്റോ വെബ്ബാണ് ഇക്കാര്യം റിപ്പോർട്ട് ചെയ്തിരിക്കുന്നത്. താരത്തിന്റെ സാഹചര്യം ഇപ്പോൾ ലിവർപൂൾ നിരീക്ഷിച്ചുവരികയാണ്.ഡിബാലയിൽ ലിവർപൂൾ അധികൃതർ സംതൃപ്തരാണ്.അത്കൊണ്ട് തന്നെ വരും ആഴ്ച്ചകളിൽ ലിവർപൂൾ ഓഫർ മുന്നോട്ട് വെക്കാനും സാധ്യതയുണ്ടെന്ന് ഇവർ കൂട്ടിച്ചേർക്കുന്നു.

എന്നാൽ ഇന്റർ മിലാൻ, മാഞ്ചസ്റ്റർ യുണൈറ്റഡ് എന്നിവരും ഡിബാലയിൽ ആകൃഷ്ടരാണ്.പക്ഷെ ഡിബാല യുവന്റസ് വിടാനുള്ള തീരുമാനം എടുത്തിട്ടില്ല. തനിക്ക് അർഹിച്ച പരിഗണന നൽകുകയാണെങ്കിൽ യുവന്റസിൽ തന്നെ തുടരാനാണ് ദിബാല ആലോചിക്കുന്നത്.