ഞാൻ പുതിയ ഫെർഗൂസനാണെന്ന് വിചാരിക്കും : യുണൈറ്റഡ് ആരാധകരെ കുറിച്ച് അമോറിം

ഈ സീസണിൽ വളരെ മോശം പ്രകടനം നടത്തിയതിനെ തുടർന്നായിരുന്നു മാഞ്ചസ്റ്റർ യുണൈറ്റഡ് അവരുടെ പരിശീലകനായ എറിക്ക് ടെൻഹാഗിനെ പരിശീലക സ്ഥാനത്ത് നിന്നും പുറത്താക്കിയത്. പകരം സ്പോർട്ടിംഗ് സിപിയുടെ പോർച്ചുഗീസ് പരിശീലകനായ റൂബൻ അമോറിമിനെ അവർ നിയമിച്ചിട്ടുണ്ട്. ഇന്റർനാഷണൽ ബ്രേക്കിന് ശേഷമാണ് അദ്ദേഹം മാഞ്ചസ്റ്റർ യുണൈറ്റഡിൽ എത്തുക.അതിന് മുൻപ് അദ്ദേഹത്തിന്റെ കീഴിൽ സ്പോർട്ടിംഗ് സിപി മാഞ്ചസ്റ്റർ സിറ്റിക്കെതിരെ ഒരു മത്സരം കളിക്കുന്നുണ്ട്.

ഈ മത്സരത്തിൽ മാഞ്ചസ്റ്റർ സിറ്റിയെ പരാജയപ്പെടുത്താൻ കഴിഞ്ഞാൽ തന്റെ ഹൈപ്പ് വർദ്ധിക്കും എന്ന കാര്യത്തിൽ റൂബൻ അമോറിം ജാഗരൂകനാണ്. സിറ്റിയെ പരാജയപ്പെടുത്തിയാൽ പുതിയ ഫെർഗൂസൻ വരുന്നുണ്ടെന്ന് യുണൈറ്റഡ് ആരാധകർ പ്രതീക്ഷിക്കുമെന്നും എന്നാൽ താൻ അതിനെ കുറിച്ച് ചിന്തിക്കുന്നില്ല എന്നുമാണ് ഈ പരിശീലകൻ പറഞ്ഞിട്ടുള്ളത്.അമോറിമിന്റെ വാക്കുകൾ ഇങ്ങനെയാണ്.

” മാഞ്ചസ്റ്റർ യുണൈറ്റഡ് ആരാധകരുടെ പ്രതീക്ഷകൾ വർദ്ധിക്കുന്ന കാര്യത്തിനെ കുറിച്ച് ഞാൻ അങ്ങനെ ചിന്തിക്കുന്നില്ല.എന്റെ ഇപ്പോഴത്തെ ശ്രദ്ധ സ്പോർട്ടിംഗ് സിപിയെ വിജയിപ്പിക്കുന്നതിലാണ്.കൺക്ലൂഷന് ഞാൻ വലിയ പ്രാധാന്യമൊന്നും നൽകുന്നില്ല.ഞങ്ങൾ മാഞ്ചസ്റ്റർ സിറ്റിയെ പരാജയപ്പെടുത്തി കഴിഞ്ഞാൽ യുണൈറ്റഡിന് പുതിയ ഫെർഗൂസനെ ലഭിച്ചു എന്ന് യുണൈറ്റഡ് ആരാധകർ പ്രതീക്ഷിച്ചേക്കാം.അത് കാര്യങ്ങളെ കൂടുതൽ ബുദ്ധിമുട്ടിലാക്കുകയാണ് ചെയ്യുക.പ്രതീക്ഷകൾ വർദ്ധിക്കാൻ കാരണമാകും. പക്ഷേ ഞാൻ അതിന് പ്രാധാന്യം നൽകുന്നില്ല ” ഇതാണ് അമോറിം പറഞ്ഞിട്ടുള്ളത്.

സിറ്റിയും സ്പോർട്ടിംഗും തമ്മിലുള്ള മത്സരം ഇന്ന് രാത്രി ഇന്ത്യൻ സമയം 1:30നാണ് അരങ്ങേറുക. നിലവിൽ ചാമ്പ്യൻസ് ലീഗിലും പോർച്ചുഗീസ് ലീഗിലും ഗംഭീര പ്രകടനം പുറത്തെടുക്കാൻ സ്പോർട്ടിംഗ് സിപിക്ക് കഴിയുന്നുണ്ട്. എന്നാൽ അമോറിം ക്ലബ്ബ് വിടുന്നതോടെ ഇത് താളം തെറ്റുമോ എന്ന കാര്യത്തിൽ സ്പോർട്ടിംഗ് സിപിയുടെ ആരാധകർക്ക് ആശങ്കയുണ്ട്.