ക്രിസ്റ്റ്യാനോ തിരികെ കൊണ്ടു വന്നത് യുണൈറ്റഡിനോടുള്ള ഭയവും ബഹുമാനവും : പാട്രിക് എവ്ര

യുവേഫ ചാമ്പ്യൻസ് ലീഗിൽ മാഞ്ചസ്റ്റർ യുണൈറ്റഡ് തങ്ങളുടെ ആദ്യ മത്സരത്തിന് ഇന്നിറങ്ങുകയാണ്. ഇന്ന് രാത്രി ഇന്ത്യൻ സമയം 10:15-ന് നടക്കുന്ന മത്സരത്തിൽ സ്വിസ് ക്ലബായ യങ് ബോയ്സാണ് മാഞ്ചസ്റ്റർ യുണൈറ്റഡിന്റെ എതിരാളികൾ.യങ് ബോയ്സിന്റെ മൈതാനത്ത് വെച്ചാണ് ഈയൊരു മത്സരം അരങ്ങേറുക.

സൂപ്പർ താരം ക്രിസ്റ്റ്യാനോ റൊണാൾഡോ ഈ മത്സരത്തിനുള്ള ആദ്യ ഇലവനിൽ ഉണ്ടാകുമെന്നാണ് പ്രതീക്ഷിക്കപ്പെടുന്നത്.ഈ മത്സരത്തിന് മുന്നേ ക്രിസ്റ്റ്യാനോ റൊണാൾഡോ ഒരു പോസ്റ്റ്‌ പങ്കു വെച്ചിരുന്നു.ഓൾഡ് ട്രാഫോഡിലെ ആരാധകർക്ക്‌ നന്ദി പറഞ്ഞു കൊണ്ടായിരുന്നു താരം പോസ്റ്റ്‌ പങ്കു വെച്ചിരുന്നത്.

ഇതിന്റെ കമന്റ് ബോക്സിൽ മുൻ യുണൈറ്റഡ് താരവും ക്രിസ്റ്റ്യാനോയുടെ സഹതാരവുമായിരുന്ന പാട്രിക് എവ്ര കുറിച്ചത് ഇങ്ങനെയാണ്. ” മാഞ്ചസ്റ്റർ യുണൈറ്റഡിന്റെ എതിരാളികളിൽ യുണൈറ്റഡിനോട് ഭയവും ബഹുമാനവും തിരികെ കൊണ്ടു വരാൻ നിനക്ക് സാധിച്ചു ക്രിസ്റ്റ്യാനോ ” എന്നായിരുന്നു. അതായത് ക്രിസ്റ്റ്യാനോ വന്നതോട് കൂടി ഫുട്ബോൾ ലോകത്ത് യുണൈറ്റഡിനോടുള്ള ഭയവും ബഹുമാനവും തിരികെ വന്നു എന്നാണ് ഇദ്ദേഹം പറഞ്ഞു വെക്കുന്നത്.

ഏതായാലും കഴിഞ്ഞ മത്സരത്തിലെ ഇരട്ടഗോളോട് കൂടി 120 ഗോളുകൾ യുണൈറ്റഡിനായി തികയ്ക്കാൻ റൊണാൾഡോക്ക്‌ സാധിച്ചിരുന്നു. താരത്തിൽ തന്നെയാണ് ആരാധകരുടെ പ്രതീക്ഷകൾ മുഴുവനുമുള്ളത്.