ക്രിസ്റ്റ്യാനോ അനുയോജ്യനല്ല,സ്വന്തമാക്കേണ്ടത് ബാഴ്സ സൂപ്പർ താരത്തെ :ചെൽസിക്ക് ഉപദേശവുമായി മുൻ താരം!

ഈ ട്രാൻസ്ഫർ ജാലകത്തിലായിരുന്നു സൂപ്പർ താരം റൊമേലു ലുക്കാക്കു ചെൽസി വിട്ടുകൊണ്ട് ഇന്ററിലേക്ക് തന്നെ മടങ്ങിയത്.അതുകൊണ്ടുതന്നെ ചെൽസിക്ക് ഒരു മികച്ച സ്ട്രൈക്കറെ ഇപ്പോഴും ആവശ്യമുണ്ട്. സൂപ്പർ താരം റൊണാൾഡോയെ ചെൽസി പരിഗണിച്ചിരുന്നതായി വാർത്തകൾ ഉണ്ടായിരുന്നു.എന്നാൽ ആ സാധ്യതകളെല്ലാം തന്നെ ഇപ്പോൾ അവസാനിച്ചിട്ടുണ്ട്.

ഇപ്പോഴിതാ ഈ വിഷയത്തിൽ മുൻ താരമായിരുന്ന ജേസൺ കന്റി ചെൽസിക്ക് ചില ഉപദേശങ്ങൾ നൽകിയിട്ടുണ്ട്. അതായത് റൊണാൾഡോ ടുഷേലിന്റെ ശൈലിക്ക് അനുയോജ്യനായ ഒരു താരമല്ലെന്നും മറിച്ച് ബാഴ്സ സൂപ്പർതാരമായ ഒബമയാങ്ങിനെയാണ് ചെൽസി സ്വന്തമാക്കേണ്ടത് എന്നുമാണ് ഇദ്ദേഹം പറഞ്ഞിട്ടുള്ളത്. കഴിഞ്ഞ ദിവസം ടോക്ക് സ്പോർട്ടിൽ സംസാരിക്കുകയായിരുന്നു ജേസൺ.അദ്ദേഹത്തിന്റെ വാക്കുകൾ ഇങ്ങനെയാണ്.

” എന്നെ സംബന്ധിച്ചിടത്തോളം ഒബമയാങ്ങ് ഒരു മികച്ച താരമാണ്. ബാഴ്സയിൽ ഇപ്പോൾ ലെവന്റോസ്ക്കി എത്തിയിട്ടുണ്ട്. അതുകൊണ്ടുതന്നെ ഒബമയാങ്ങിന് ബാഴ്സയിൽ അവസരങ്ങൾ കുറവായിരിക്കും.ഒബമയാങ്ങിനെക്കാൾ ബാഴ്സ ലെവന്റോസ്ക്കിക്കാണ് പരിഗണന നൽകുക എന്നുള്ളത് ആർക്കാണ് അറിഞ്ഞുകൂടാത്തത്.ഒബമയാങ്ങ് ചെൽസിയിലേക്ക് വരുന്നതിനെ ഞാൻ ഇഷ്ടപ്പെടുന്നു.തോമസ് ടുഷേലിന് കീഴിൽ റൊണാൾഡോ ചെൽസിക്ക് അനുയോജ്യനാവുമെന്ന് എനിക്ക് തോന്നുന്നില്ല. റൊണാൾഡോക്കും ടുഷേലിനും ഒരുമിച്ച് പോവാൻ കഴിയില്ല. അതുകൊണ്ടുതന്നെ ചെൽസി റൊണാൾഡോയെ എത്തിക്കുന്നതിനേക്കാൾ നല്ലത് ഒബമയാങ്ങിനെ എത്തിക്കുന്നതാണ് എന്നാണ് എന്റെ അഭിപ്രായം ” ഇതാണ് ജേസൺ പറഞ്ഞിട്ടുള്ളത്.

ഒബമയാങ്ങിൽ ചെൽസി താല്പര്യം പ്രകടിപ്പിച്ചിട്ടുണ്ട് എന്നുള്ള വാർത്തകൾ ഈയിടെ പുറത്തേക്ക് വന്നിരുന്നു.എന്നാൽ ബാഴ്സ അദ്ദേഹത്തെ വിൽക്കാൻ ഉദ്ദേശിക്കുന്നില്ല എന്നാണ് അറിയാൻ സാധിക്കുന്നത്.