കിരീടനേട്ടം ആഘോഷിക്കാൻ സകരിയയെ ഡ്രസിങ് റൂമിലേക്ക് കൊണ്ട് വന്ന് സലാ,കയ്യടി!

ഇന്നലെ എഫ്എ കപ്പിൽ നടന്ന കലാശപ്പോരാട്ടത്തിൽ ചെൽസിയെ പരാജയപ്പെടുത്തിക്കൊണ്ട് കിരീടം ചൂടാൻ വമ്പന്മാരായ ലിവർപൂളിന് സാധിച്ചിരുന്നു. പെനാൽറ്റി ഷൂട്ടൗട്ടിലായിരുന്നു ചെൽസിയെ ലിവർപൂൾ കീഴടക്കിയത്. ഇതോടെ ഈ സീസണിൽ രണ്ട് കിരീടങ്ങൾ നേടാൻ ക്ലോപ്പിനും സംഘത്തിനും സാധിച്ചിരുന്നു.

ഏതായാലും ഈ കിരീടനേട്ടം ആഘോഷിക്കാൻ ലിവർപൂളിന്റെ ഈജിപ്ഷ്യൻ സൂപ്പർതാരമായ മുഹമ്മദ് സലാ ഒരു അതിഥിയെ ഡ്രസ്സിംഗ് റൂമിലേക്ക് ക്ഷണിക്കുകയായിരുന്നു.മുൻ ഈജിപ്ഷ്യൻ താരമായിരുന്ന മൊഹ്മീൻ സകരിയയായിരുന്നു ആ അതിഥി. വീൽചെയറിലായിരുന്നു സകരിയ ഡ്രസ്സിങ് റൂമിൽ എത്തിയത്. ഇദ്ദേഹത്തോടൊപ്പം ലിവർപൂൾ താരങ്ങൾ ഒന്നടങ്കം കിരീടനേട്ടം ആഘോഷിക്കുകയായിരുന്നു. ഇതിന്റെ വീഡിയോകൾ സാമൂഹിക മാധ്യമങ്ങളിൽ ഇപ്പോൾ വൈറലാണ്. വലിയ രൂപത്തിലുള്ള പ്രശംസകളാണ് സലാക്കും ലിവർപൂളിനും ഇപ്പോൾ ലഭിച്ചുകൊണ്ടിരിക്കുന്നത്.

ഈജിപ്തിന് വേണ്ടി 12 മത്സരങ്ങൾ കളിച്ച താരമാണ് സകരിയ. മാത്രമല്ല പ്രശസ്തമായ ഏഷ്യൻ ക്ലബായ അൽ അഹ്ലിക്ക് വേണ്ടിയും ഇദ്ദേഹം കളിച്ചിട്ടുണ്ട്. എന്നാൽ സമീപകാലത്ത് അമിയോട്രോഫിക്ക് ലാറ്ററൽ സിറോസിസ് എന്ന രോഗം ഇദ്ദേഹത്തെ പിടികൂടുകയായിരുന്നു. ഇതോടെ അദ്ദേഹത്തിന്റെ കരിയർ അവസാനിച്ചു. നിലവിൽ വീൽചെയറിലാണ് അദ്ദേഹം തന്റെ ജീവിതം മുന്നോട്ടു കൊണ്ടുപോകുന്നത്.

എന്നാൽ തന്റെ സുഹൃത്തായ സകരിയയെ കൈവിടാൻ സലാ ഒരുക്കമല്ലായിരുന്നു. പല രൂപത്തിലുള്ള സഹായങ്ങളും സലാ ഇദ്ദേഹത്തിന് ചെയ്തിട്ടുണ്ട്.ഒടുവിലിപ്പോൾ FA കപ്പ് കിരീടനേട്ടം ആഘോഷിക്കാൻ തന്റെ സുഹൃത്തിനെ സലാ ഒപ്പം കൂട്ടുകയായിരുന്നു. ഏതായാലും FA കപ്പ് കയ്യിൽ പിടിച്ചു ആഘോഷിക്കുന്ന സകരിയയുടെ വീഡിയോ സോഷ്യൽ മീഡിയകളിൽ ഇപ്പോൾ വൈറലാണ്.