കിരീടങ്ങൾ നേടണോ? ബാലൺ ഡി’ഓറിന് വേണ്ടി പോരാടണോ? ആ ക്ലബ്ബിലേക്ക് തന്നെ ചേക്കേറൂ : റൊണാൾഡോക്ക് പോർച്ചുഗീസ് സഹതാരത്തിന്റെ ഉപദേശം!

സൂപ്പർ താരം ക്രിസ്റ്റ്യാനോ റൊണാൾഡോയുടെ ഭാവി ഇപ്പോഴും തീരുമാനമായിട്ടില്ല. അദ്ദേഹം മാഞ്ചസ്റ്റർ യുണൈറ്റഡിൽ തന്നെ തുടരുമോ അതോ മാഞ്ചസ്റ്റർ യുണൈറ്റഡ് വിടുമോ എന്നുള്ള കാര്യത്തിൽ ഇതുവരെ സ്ഥിരീകരണങ്ങൾ ഒന്നും ലഭിച്ചിട്ടില്ല. പല ക്ലബ്ബുകളെയും അദ്ദേഹത്തെ ബന്ധപ്പെടുത്തിക്കൊണ്ട് വാർത്തകൾ ഇപ്പോൾ സജീവമാണ്.

ഏതായാലും റൊണാൾഡോയുടെ പോർച്ചുഗീസ് സഹതാരമായ ഹോസേ ഫോന്റെ റൊണാൾഡോക്ക് ചില ഉപദേശങ്ങൾ നൽകിയിട്ടുണ്ട്. അതായത് കിരീടങ്ങൾ നേടണമെങ്കിലും ബാലൺ ഡി’ഓറിന് വേണ്ടി പോരാടണമെങ്കിലും റൊണാൾഡോ റയലിലേക്ക് തന്നെ മടങ്ങി പോകണമെന്നാണ് ഇദ്ദേഹം പറഞ്ഞിട്ടുള്ളത്. റൊണാൾഡോക്ക് മുന്നിലുള്ള ബെസ്റ്റ് ഓപ്ഷൻ റയൽ മാഡ്രിഡ് തന്നെയാണെന്നും ഇദ്ദേഹം കൂട്ടിച്ചേർത്തിട്ടുണ്ട്.ഫോന്റെയുടെ വാക്കുകളെ ടോക്ക് സ്പോർട് റിപ്പോർട്ട് ചെയ്യുന്നത് ഇങ്ങനെയാണ്.

” യുവേഫ ചാമ്പ്യൻസ് ലീഗിനെ ഇഷ്ടപ്പെടുന്ന വ്യക്തിയാണ് റൊണാൾഡോ എന്നുള്ളത് എനിക്കറിയാം. ലോകത്തിലെ ഏറ്റവും മികച്ച കോമ്പറ്റീഷനാണ് യുവേഫ ചാമ്പ്യൻസ് ലീഗ്.അവിടെ മികച്ച പ്രകടനം നടത്തിയാൽ മാത്രമേ ബാലൺ ഡി’ഓറിന് വേണ്ടി പോരാടാൻ സാധിക്കുകയുള്ളൂ എന്നുള്ളത് റൊണാൾഡോ വിശ്വസിക്കുന്നു. മാഞ്ചസ്റ്റർ യുണൈറ്റഡ് ഒരു മികച്ച ടീമൊക്കെ തന്നെയാണ്. പക്ഷേ റൊണാൾഡോക്ക് കിരീടങ്ങൾ നേടുകയും ബാലൺ ഡി’ഓറിന് വേണ്ടി മുന്നിൽ നിന്ന് പോരാടുകയും വേണം. അതിനുള്ള ബെസ്റ്റ് ഓപ്ഷൻ റൊണാൾഡോയെ സംബന്ധിച്ചിടത്തോളം റയൽ മാഡ്രിഡിലേക്ക് മടങ്ങുക എന്നുള്ളതാണ്. പക്ഷേ റയൽ മാഡ്രിഡിന് അദ്ദേഹത്തെ വേണോ വേണ്ടയോ എന്നുള്ളത് വേറെ ഒരു ചോദ്യമാണ് ” ഇതാണ് പോർച്ചുഗീസ് താരം പറഞ്ഞിട്ടുള്ളത്.

റൊണാൾഡോയെ തിരികെ എത്തിക്കാൻ റയൽ ഉദ്ദേശിക്കുന്നില്ല എന്നുള്ളത് നേരത്തെ തന്നെ വ്യക്തമായ ഒരു കാര്യമാണ്.നിലവിൽ ചെൽസിയാണ് റൊണാൾഡോയെ ഗൗരവമായി പരിഗണിക്കുന്നത്.ഏതായാലും താരം അടുത്ത സീസണിൽ എവിടെ കളിക്കുമെന്നുള്ളത് കാത്തിരുന്നു കാണേണ്ട കാര്യം തന്നെയാണ്.