എൻസോ ചെൽസി വിടുന്നുവോ?പ്രചരിക്കുന്ന വാർത്തകളിലെ യാഥാർത്ഥ്യം വെളിപ്പെടുത്തി ഏജന്റ്!

കഴിഞ്ഞ ദിവസമായിരുന്നു അർജന്റൈൻ സൂപ്പർ താരമായ എൻസോ ഫെർണാണ്ടസുമായി ബന്ധപ്പെട്ട ഒരു വാർത്ത വന്നത്.അതായത് ചെൽസി വിട്ട് മറ്റേതെങ്കിലും ക്ലബ്ബിലേക്ക് പോകാൻ എൻസോ ആഗ്രഹിക്കുന്നുവെന്നും അദ്ദേഹത്തിന്റെ ഏജന്റ് മറ്റുള്ള ഓപ്ഷനുകൾ പരിഗണിച്ചു തുടങ്ങി എന്നുമായിരുന്നു വാർത്ത. എന്നാൽ ഇന്നലെ നടന്ന മത്സരത്തിൽ ആസ്റ്റൻ വില്ലക്കെതിരെ ഒരു തകർപ്പൻ ഫ്രീകിക്ക് ഗോൾ എൻസോ നേടിയിരുന്നു. അതിനുശേഷം നടത്തിയ സെലിബ്രേഷനിൽ ചെൽസിയിൽ തന്നെ തുടരും എന്നുള്ള ഒരു സൂചന അദ്ദേഹം നൽകിയിരുന്നു.

ഏതായാലും ഇക്കാര്യത്തിലെ കൂടുതൽ വിവരങ്ങൾ ഇപ്പോൾ അദ്ദേഹത്തിന്റെ ഏജന്റായ പെരസ് നൽകിയിട്ടുണ്ട്.ചെൽസി വിട്ടു പോവാൻ എൻസോ ഉദ്ദേശിക്കുന്നില്ല എന്നാണ് ഏജന്റ് വ്യക്തമാക്കിയിട്ടുള്ളത്. ടീമിന്റെ വിജയങ്ങളും നേട്ടങ്ങളും മാത്രമാണ് എൻസോയുടെ ലക്ഷ്യമെന്നും ഏജന്റ് പറഞ്ഞിട്ടുണ്ട്.അദ്ദേഹത്തിന്റെ വാക്കുകൾ ഇങ്ങനെയാണ്.

” ചെൽസി വിട്ടുപോവാൻ ഇപ്പോൾ താരത്തിന് യാതൊരുവിധ ഉദ്ദേശവും ഇല്ല. ഈ പ്രോജക്റ്റിന്റെ കാര്യത്തിൽ ലീഡർമാർക്ക് വളരെയധികം വ്യക്തതയുണ്ട്.ഒരുപാട് യുവതാരങ്ങൾ ആയതിനാൽ തുടക്കം ബുദ്ധിമുട്ട് തന്നെയായിരിക്കും. പക്ഷേ ട്രാക്കിലായിക്കഴിഞ്ഞാൽ ചെൽസി മുന്നോട്ടു പോവുക തന്നെ ചെയ്യും.ടീമിന്റെ വിജയങ്ങളും നേട്ടങ്ങളും മാത്രമാണ് അവൻ ആഗ്രഹിക്കുന്നത്. ഞങ്ങൾ മറ്റുള്ള ക്ലബ്ബുകളുമായി ഇതുവരെ സംസാരിച്ചിട്ടില്ല. എന്താണ് താരം ആഗ്രഹിക്കുന്നത് എന്നുള്ളത് ഞങ്ങൾക്ക് അറിയാം.ടീം മറ്റൊരു പൊസിഷനിൽ എത്താനാണ് അദ്ദേഹം ആഗ്രഹിക്കുന്നത് “ഇതാണ് എൻസോയുടെ ഏജന്റ് പറഞ്ഞിട്ടുള്ളത്.

കഴിഞ്ഞ വേൾഡ് കപ്പിലെ ഏറ്റവും മികച്ച യുവതാരത്തിനുള്ള അവാർഡ് നേടിയ താരമാണ് എൻസോ ഫെർണാണ്ടസ്. 121 മില്യൺ യൂറോയാണ് അദ്ദേഹത്തിന് വേണ്ടി ചെൽസി ചിലവഴിച്ചിരുന്നത്. 2032 വരെയുള്ള ഒരു കോൺട്രാക്ടിലാണ് അദ്ദേഹം ക്ലബ്ബുമായി ഒപ്പു വച്ചിരിക്കുന്നത്.