എന്താണ് അവന് വേണ്ടതെന്ന് എനിക്കറിയില്ല: എൻസോക്കെതിരെ ഹാലന്റ്

ഇംഗ്ലീഷ് പ്രീമിയർ ലീഗിലെ ആദ്യ റൗണ്ട് പോരാട്ടത്തിൽ കരുത്തരായ മാഞ്ചസ്റ്റർ സിറ്റിയും ചെൽസിയും തമ്മിലായിരുന്നു ഏറ്റുമുട്ടിയിരുന്നത്. ചെൽസിയുടെ മൈതാനമായ സ്റ്റാംഫോർഡ് ബ്രിഡ്ജിൽ വെച്ച് നടന്ന മത്സരത്തിൽ എതിരില്ലാത്ത രണ്ട് ഗോളുകൾക്കാണ് സിറ്റിയോട് അവർ പരാജയപ്പെട്ടത്. സൂപ്പർ താരങ്ങളായ ഏർലിംഗ് ഹാലന്റ്,മാറ്റിയോ കൊവാസിച്ച് എന്നിവരാണ് സിറ്റിക്ക് വേണ്ടി ഗോളുകൾ നേടിയത്.മത്സരത്തിൽ മോശമല്ലാത്ത പ്രകടനം ചെൽസി നടത്തിയെങ്കിലും ഗോളടിക്കാൻ കഴിഞ്ഞില്ല എന്നുള്ളത് അവർക്ക് തിരിച്ചടിയാവുകയായിരുന്നു.

മത്സരത്തിനിടെ ചെൽസി ക്യാപ്റ്റനായ എൻസോ ഫെർണാണ്ടസ് സിറ്റി താരമായ ഏർലിംഗ് ഹാലന്റുമായി പലപ്പോഴും വാക്ക് തർക്കത്തിൽ ഏർപ്പെട്ടിരുന്നു. മത്സരത്തിനിടെ പല സമയത്തും ഹാലന്റിനെ വലിയ രൂപത്തിൽ ചാലഞ്ച് ചെയ്തിരുന്നത് എൻസോ തന്നെയായിരുന്നു. ഇത് ഇഷ്ടപ്പെടാതിരുന്ന ഹാലന്റ് പലപ്പോഴും വാഗ്വാദങ്ങൾക്ക് പോവുകയും ചെയ്തു. ഇതേക്കുറിച്ച് മത്സരശേഷം ഹാലന്റ് ചില കാര്യങ്ങൾ പറഞ്ഞിട്ടുണ്ട്.എന്താണ് എൻസോക്ക് തന്നിൽ നിന്നും വേണ്ടതെന്ന് ഇതുവരെ മനസ്സിലായിട്ടില്ല എന്നാണ് ഹാലന്റ് പറഞ്ഞിട്ടുള്ളത്.താരത്തിന്റെ വാക്കുകൾ ഇങ്ങനെയാണ്.

‘എല്ലാ സമയത്തും അവൻ എന്നെ ചവിട്ടുന്നു.എന്നെ തള്ളിയിടാൻ ശ്രമിക്കുന്നു. സാധ്യമായതെല്ലാം എന്നോട് ചെയ്യാൻ ശ്രമിക്കുന്നു.അവൻക്ക് എന്നിൽ നിന്ന് എന്താണ് വേണ്ടതെന്ന് ഇതുവരെ എനിക്ക് മനസ്സിലായിട്ടില്ല.വിജയം നേടാൻ കഴിഞ്ഞതിന്റെ കാര്യത്തിൽ ഞാൻ വളരെയധികം ഹാപ്പിയാണ്.ഞങ്ങൾ അത്ര പെർഫെക്റ്റ് ഒന്നുമായിരുന്നില്ല.എന്നിരുന്നാലും മികച്ച പ്രകടനം നടത്തി ‘ ഇതാണ് ഹാലന്റ് പറഞ്ഞിട്ടുള്ളത്.

മാഞ്ചസ്റ്റർ സിറ്റിക്ക് വേണ്ടി താരം കളിക്കുന്ന നൂറാമത്തെ മത്സരമായിരുന്നു ഇത്. 100 മത്സരങ്ങളിൽ നിന്ന് ആകെ 91 ഗോളുകളാണ് ക്ലബ്ബിനുവേണ്ടി താരം നേടിയിട്ടുള്ളത്. പ്രീമിയർ ലീഗിലെ നിലവിലെ ഗോൾഡൻ ബൂട്ട് ജേതാവ് കൂടിയാണ് ഹാലന്റ്. ഇനി അടുത്ത മത്സരത്തിൽ പ്രമോഷൻ നേടി വന്ന ഇപ്സ് വിച്ച് ടൗണിനെയാണ് മാഞ്ചസ്റ്റർ സിറ്റി നേരിടുക.