ആർക്കും മാഞ്ചസ്റ്റർ സിറ്റിയുമായി മത്സരിക്കാനാവില്ല : ക്ലോപ്!

പ്രീമിയർ ലീഗിൽ നാളെ നടക്കുന്ന പതിനൊന്നാം റൗണ്ട് പോരാട്ടത്തിൽ ഒരു തകർപ്പൻ മത്സരമാണ് ആരാധകരെ കാത്തിരിക്കുന്നത്.വമ്പൻമാരായ മാഞ്ചസ്റ്റർ സിറ്റിയുടെ എതിരാളികൾ ലിവർപൂൾ ആണ്. നാളെ രാത്രി ഇന്ത്യൻ സമയം 9 മണിക്ക് ആൻഫീൽഡിൽ വെച്ചാണ് ഈയൊരു മത്സരം നടക്കുക.

ഈ മത്സരത്തിന് മുന്നോടിയായി ചില കാര്യങ്ങൾ ലിവർപൂൾ പരിശീലകനായ യുർഗൻ ക്ലോപ് പറഞ്ഞിട്ടുണ്ട്.മാഞ്ചസ്റ്റർ സിറ്റിയുമായി ആർക്കും മത്സരിക്കാനാവില്ല എന്നാണ് ഇദ്ദേഹം പറഞ്ഞിട്ടുള്ളത്.അതിനുള്ള പ്രധാനകാരണം അവരുടെ സാമ്പത്തിക ശക്തിയാണെന്നും ക്ലോപ് കൂട്ടിച്ചേർത്തിട്ടുണ്ട്. അദ്ദേഹത്തിന്റെ വാക്കുകളെ ഗോൾ ഡോട്ട് കോം റിപ്പോർട്ട് ചെയ്യുന്നത് ഇങ്ങനെയാണ്.

” മാഞ്ചസ്റ്റർ സിറ്റിയെ പറ്റിയുള്ള ഈ ചോദ്യത്തിന് ഞാൻ നൽകുന്ന ഉത്തരം നിങ്ങൾക്ക് ഒരുപക്ഷേ ഇഷ്ടപ്പെടുമായിരിക്കില്ല.മാഞ്ചസ്റ്റർ സിറ്റിയുമായി ആർക്കും മത്സരിക്കാൻ സാധിക്കില്ല. ലോകത്തിലെ ഏറ്റവും മികച്ച ടീം ഉണ്ടായിട്ടും ലോകത്തിലെ ഏറ്റവും മികച്ച സ്ട്രൈക്കറേ സ്വന്തമാക്കാൻ അവർക്ക് സാധിച്ചു. അതിന്റെ സാമ്പത്തിക ചിലവ് എന്താണ് എന്നുള്ളതൊന്നും അവർക്ക് വിഷയമല്ല. ഞാൻ ഈ പറഞ്ഞത് അവർക്ക് ഇഷ്ടമാവില്ല എന്നറിയാം. പക്ഷേ നിങ്ങൾ ചോദിച്ച ചോദ്യത്തിന് എനിക്ക് മറുപടി പറഞ്ഞല്ലേ മതിയാവൂ.ഞങ്ങൾക്ക് മാഞ്ചസ്റ്റർ സിറ്റിയെപ്പോലെ നടിക്കാൻ കഴിയില്ല.അത് സാധ്യമായ കാര്യമല്ല. നിലവിൽ ലോക ഫുട്ബോളിൽ മൂന്ന് ക്ലബ്ബുകളുണ്ട്. അവർ സാമ്പത്തികപരമായി വളരെയധികം ശക്തരാണ്. അവർക്ക് വേണ്ടതെന്തും ചെയ്യാൻ സാധിക്കും. അത് നിയമപരമാണ്. പക്ഷേ അവർക്ക് എന്തും ചെയ്യാൻ കഴിയുമെന്ന് നിങ്ങൾ മനസ്സിലാക്കണം ” ലിവർപൂൾ പരിശീലകൻ പറഞ്ഞു.

നിലവിൽ ലിവർപൂൾ ഒരു മോശം അവസ്ഥയിലൂടെയാണ് പോയിക്കൊണ്ടിരിക്കുന്നത്.നിലവിൽ 11ആം സ്ഥാനത്താണ് ലിവർപൂൾ ഉള്ളത്. രണ്ടാം സ്ഥാനക്കാരായ സിറ്റിയെക്കാൾ 13 പോയിന്റിനാണ് ലിവർപൂൾ പിറകിൽ നിൽക്കുന്നത്.