അടുത്ത സീസണിൽ യുണൈറ്റഡിന്റെ ക്യാപ്റ്റനാര്? വ്യക്തമായ ഉത്തരവുമായി ടെൻ ഹാഗ്!

കഴിഞ്ഞ സീസണിൽ മാഞ്ചസ്റ്റർ യുണൈറ്റഡിന് മികച്ച പ്രകടനം പുറത്തെടുക്കാൻ കഴിഞ്ഞിട്ടില്ല എന്നുള്ളത് യാഥാർത്ഥ്യമാണ്. അതുകൊണ്ടുതന്നെ വലിയ വിമർശനങ്ങൾ കേൾക്കേണ്ടി വന്നിരുന്നു. മാത്രമല്ല യുണൈറ്റഡിന്റെ ക്യാപ്റ്റനായ ഹാരി മഗ്വയ്ർ പലപ്പോഴും മോശം പ്രകടനമായിരുന്നു നടത്തിയിരുന്നത്. അതുകൊണ്ടുതന്നെ ഇനി വരുന്ന സീസണിൽ അദ്ദേഹത്തെ ക്യാപ്റ്റൻ സ്ഥാനത്ത് നിന്നും നീക്കം ചെയ്യണമെന്നുള്ള മുറവിളി ആരാധകർക്കിടയിൽ നിന്ന് തന്നെ ഉയർന്നുവന്നിരുന്നു.

എന്നാൽ അടുത്ത സീസണിലും ഹാരി മഗ്വയ്ർ തന്നെയായിരിക്കും യുണൈറ്റഡിന്റെ ക്യാപ്റ്റൻ. യുണൈറ്റഡിന്റെ പുതിയ പരിശീലകനായ എറിക്ക് ടെൻ ഹാഗാണ് ഇക്കാര്യം അറിയിച്ചിട്ടുള്ളത്.റൊണാൾഡോ,ബ്രൂണോ,ഡിഹിയ എന്നിവരിൽ ഒരാൾ ക്യാപ്റ്റനായേക്കുമെന്നുള്ള റൂമറുകൾ ഈയിടെ ഉണ്ടായിരുന്നു. എന്നാൽ ഇതിൽ ഒരു മാറ്റം വരുത്താൻ ടെൻ ഹാഗ് തയ്യാറാകാതെയിരിക്കുകയായിരുന്നു.

കുറച്ച് മുമ്പ് നടത്തിയ പത്രസമ്മേളനത്തിലാണ് മഗ്വയ്ർ തന്നെ ക്യാപ്റ്റൻ സ്ഥാനത്ത് തുടരുമെന്ന് ടെൻ ഹാഗ് പറഞ്ഞത്. അദ്ദേഹത്തിന്റെ വാക്കുകളെ മാഞ്ചസ്റ്റർ ഈവനിംഗ് ന്യൂസ് റിപ്പോർട്ട് ചെയ്യുന്നത് ഇങ്ങനെയാണ്.

” ഹാരി മഗ്വയ്റാണ് ക്യാപ്റ്റൻ.അതങ്ങനെ തുടരുക തന്നെ ചെയ്യും.അദ്ദേഹം സ്ഥാപിതമായ ക്യാപ്റ്റനാണ്.അദ്ദേഹം ഒരുപാട് വിജയങ്ങൾ നേടിയിട്ടുണ്ട്. ഈയൊരു വിഷയത്തിൽ എനിക്ക് സംശയങ്ങളൊന്നുമില്ല ” ഇതാണ് ടെൻ ഹാഗ് പറഞ്ഞിട്ടുള്ളത്.