സിറ്റി എന്നും സിറ്റി തന്നെ: എഴുതിത്തള്ളാതെ സലാ

ഇന്നലെ ഇംഗ്ലീഷ് പ്രീമിയർ ലീഗിൽ നടന്ന മത്സരത്തിൽ വിജയം നേടാൻ വമ്പൻമാരായ ലിവർപൂളിന് കഴിഞ്ഞിരുന്നു. രണ്ടിനെതിരെ മൂന്നു ഗോളുകൾക്കാണ് അവർ സതാംപ്റ്റണെ പരാജയപ്പെടുത്തിയത്. മുഹമ്മദ് സലാ നേടിയ ഇരട്ട ഗോളുകളാണ് അവർക്ക് വിജയം സമ്മാനിച്ചിട്ടുള്ളത്. നിലവിൽ പ്രീമിയർ ലീഗിൽ ഒന്നാം സ്ഥാനത്ത് ലിവർപൂൾ തന്നെയാണ്.രണ്ടാം സ്ഥാനക്കാരായ മാഞ്ചസ്റ്റർ സിറ്റിയെക്കാൾ 8 പോയിന്റിന്റെ ലീഡ് സ്വന്തമാക്കാൻ ലിവർപൂളിന് ഇപ്പോൾ കഴിഞ്ഞിട്ടുണ്ട്.

മാഞ്ചസ്റ്റർ സിറ്റിക്ക് ഇത് മോശം സമയമാണ്. അവസാനമായി കളിച്ച 5 മത്സരങ്ങളിലും അവർ പരാജയപ്പെടുകയാണ് ചെയ്തിട്ടുള്ളത്. എന്നാൽ മാഞ്ചസ്റ്റർ സിറ്റിയെ ഒരിക്കലും എഴുതിത്തള്ളാൻ സലാ ഒരുക്കമല്ല. സിറ്റി ഒന്നും സിറ്റി തന്നെ എന്നാണ് സലാ ഇപ്പോൾ പറഞ്ഞിട്ടുള്ളത്.അദ്ദേഹത്തിന്റെ വാക്കുകൾ ഇപ്രകാരമാണ്.

” ഇന്ന് നേടിയ ഗോളുകൾ വളരെ പ്രധാനപ്പെട്ടതായിരുന്നു. കാരണം പിറകിൽ നിന്നതിനുശേഷമാണ് ഞങ്ങൾ തിരിച്ചടിച്ചത്.വിജയം നേടാൻ സാധിച്ചത് വളരെ പ്രധാനപ്പെട്ട കാര്യമാണ്. എതിരാളികൾക്ക് കൃത്യമായ ഗെയിം പ്ലാൻ ഉണ്ടായിരുന്നു.അവർ മികച്ച പ്രകടനം പുറത്തെടുക്കുകയും ചെയ്തു.ഞങ്ങൾ ഇതേ രൂപത്തിൽ തന്നെ മുന്നോട്ടു പോകേണ്ടതുണ്ട്. അടുത്ത പ്രീമിയർ ലീഗ് മത്സരത്തിൽ മാഞ്ചസ്റ്റർ സിറ്റിയാണ് ഞങ്ങളുടെ എതിരാളികൾ.അവരെ പരാജയപ്പെടുത്തിക്കൊണ്ട് 11 പോയിന്റിന്റെ ലീഡ് സ്വന്തമാക്കാൻ കഴിയും എന്ന് ഞങ്ങൾ പ്രതീക്ഷിക്കുന്നു. പക്ഷേ മാഞ്ചസ്റ്റർ സിറ്റി എന്നും മാഞ്ചസ്റ്റർ സിറ്റിയാണ്. ഇപ്പോൾ അവർക്കൊരു മോശം സമയമായിരിക്കാം. എന്നിരുന്നാലും ഒരുപാട് മികച്ച താരങ്ങൾ അവർക്കുണ്ട് “ഇതാണ് സല പറഞ്ഞിട്ടുള്ളത്.

വളരെ പ്രധാനപ്പെട്ട രണ്ടു മത്സരങ്ങളാണ് ലിവർപൂളിനെ ഇപ്പോൾ കാത്തിരിക്കുന്നത്. അടുത്ത ചാമ്പ്യൻസ് ലീഗ് മത്സരത്തിൽ റയൽ മാഡ്രിഡ് ആണ് ലിവർപൂളിന്റെ എതിരാളികൾ.അതിനുശേഷം പ്രീമിയർ ലീഗിൽ മാഞ്ചസ്റ്റർ സിറ്റിയെയാണ് നേരിടുക. എന്നാൽ ഈ രണ്ടു മത്സരങ്ങളും ആൻഫീൽഡിലാണ് നടക്കുന്നത് എന്നത് ലിവർപൂളിന് ആശ്വാസം നൽകുന്ന കാര്യമാണ്.