സുവാരസ്‌ മയാമിയിലേക്കോ എന്ന കാര്യത്തിൽ പുതിയ അപ്ഡേഷനുമായി ജോർഡി ആൽബ!

ഇന്റർ മയാമിയുടെ ഈ സീസൺ ഇപ്പോൾ അവസാനിച്ചിട്ടുണ്ട്.എംഎൽഎസിൽ പ്ലേ ഓഫ് കാണാതെ പുറത്തായെങ്കിലും ക്ലബ്ബിന്റെ ചരിത്രത്തിലെ ആദ്യ കിരീടം നേടാൻ ഈ സീസണിൽ സാധിച്ചു എന്നുള്ളത് ഇന്റർ മയാമി ആരാധകർക്ക് സന്തോഷം നൽകുന്ന കാര്യമാണ്. സൂപ്പർ താരം ലയണൽ മെസ്സി വന്നതോടുകൂടിയാണ് ഇന്ററിന് ഇത്രയധികം ശ്രദ്ധ ലഭിച്ചു തുടങ്ങിയത്.ജോർഡി ആൽബ,സെർജിയോ ബുസ്ക്കെറ്റ്സ് എന്നിവരും മയാമിയുടെ താരങ്ങളാണ്.

വരുന്ന ജനുവരി ട്രാൻസ്ഫർ ജാലകത്തിൽ ലൂയിസ് സുവാരസിനെ കൊണ്ടുവരാൻ ഇന്റർ മയാമിക്ക് താല്പര്യമുണ്ട്. അദ്ദേഹം വരുമെന്നുള്ള റൂമറുകൾ ഇപ്പോൾ സജീവമാണ്. സൂപ്പർ താരമായ ജോർഡി ആൽബ ഈ റൂമറിൽ തന്റെ പ്രതികരണം രേഖപ്പെടുത്തിയിട്ടുണ്ട്.താരത്തിന്റെ വാക്കുകൾ ഇങ്ങനെയാണ്.

“ഗ്രിമിയോയുടെ വളരെ പ്രധാനപ്പെട്ട താരമാണ് സുവാരസ്.തീർച്ചയായും അദ്ദേഹത്തിന് അവിടെ കോൺട്രാക്ടുണ്ട്. തീരുമാനങ്ങൾ എടുക്കേണ്ടത് അദ്ദേഹത്തിന്റെ ക്ലബ്ബും പരിശീലകനും അദ്ദേഹവുമാണ്. ഞാൻ അതിൽ ഇടപെടാനൊന്നും പോകുന്നില്ല.തീർച്ചയായും അദ്ദേഹം ഇവിടേക്ക് വരാൻ ഞാൻ ആഗ്രഹിക്കുന്നു.മികച്ച താരങ്ങളോടൊപ്പം കളിക്കാൻ ഞാൻ ആഗ്രഹിക്കുന്നുണ്ട് എന്നുള്ളത് ഞാനെപ്പോഴും പറയുന്ന കാര്യമാണ്.സുവാരസ് വളരെയധികം മികച്ച ഒരു താരമാണ്. അദ്ദേഹം എന്റെ അടുത്ത സുഹൃത്ത് കൂടിയാണ്. അദ്ദേഹം ഇവിടേക്ക് വരുമെന്നും ഞങ്ങളെ സഹായിക്കുമെന്നും ഞാൻ പ്രതീക്ഷിക്കുന്നു ” ഇതാണ് ആൽബ പറഞ്ഞിട്ടുള്ളത്.

അതേസമയം സുവാരസ് ഇന്റർ മയാമിയിലേക്ക് എത്താനുള്ള സാധ്യതകൾ വർദ്ധിക്കുകയാണ്.ഗ്രിമിയോയുമായുള്ള തന്റെ കോൺട്രാക്ട് റദ്ദാക്കിക്കൊണ്ട് അമേരിക്കയിലേക്ക് എത്താനുള്ള പദ്ധതികൾക്കാണ് അദ്ദേഹം രൂപം നൽകിയിട്ടുള്ളത്. അതുമായി ബന്ധപ്പെട്ട ചർച്ചകൾ അദ്ദേഹം തന്റെ ബ്രസീലിയൻ ക്ലബ്ബുമായി നടത്തുന്നുണ്ട്.