മെസ്സി സൗദിയിലും ക്രിസ്റ്റ്യാനോയുടെ സ്വൈര്യം കെടുത്തുന്നു:ബെൻ ജേക്കബ്സ്

സൂപ്പർ താരം ക്രിസ്റ്റ്യാനോ റൊണാൾഡോ തകർപ്പൻ പ്രകടനമാണ് പതിവ് പോലെ ഈ സീസണിലും നടത്തുന്നത്. സൗദി ലീഗിൽ ഈ സീസണിൽ ഏറ്റവും കൂടുതൽ ഗോളുകൾ നേടിയ റൊണാൾഡോ തന്നെയാണ്. പക്ഷേ അൽ നസ്റിന് കാര്യങ്ങൾ എളുപ്പമല്ല.കിരീടങ്ങൾ ഒന്നും നേടാൻ അവർക്ക് സാധിക്കുന്നില്ല.അത് ക്രിസ്റ്റ്യാനോക്ക് തിരിച്ചടി ഏൽപ്പിക്കുന്ന കാര്യമാണ്.

ഈ സീസണിൽ പലപ്പോഴും വിവാദങ്ങളിൽ പെട്ട താരമാണ് റൊണാൾഡോ. എതിർ ആരാധകരുടെ പ്രകോപനങ്ങളിൽ അദ്ദേഹം പലപ്പോഴും വീണു പോകാറുണ്ട്. അതിനെ തുടർന്ന് വിവാദമായ പലതും അദ്ദേഹം പ്രവർത്തിക്കാറുണ്ട്. ലയണൽ മെസ്സിയുടെ പേര് ചാന്റ് ചെയ്തുകൊണ്ടാണ് എതിർ ആരാധകർ അദ്ദേഹത്തെ പ്രകോപിപ്പിക്കാറുള്ളത്. ഇതേക്കുറിച്ച് ടോക്ക്സ്പോർട്ടിന്റെ ഫുട്ബോൾ നിരീക്ഷകനായ ബെൻ ജേക്കബ്സ് ചില കാര്യങ്ങൾ പറഞ്ഞിട്ടുണ്ട്. ലയണൽ മെസ്സി സൗദിയിലും റൊണാൾഡോയുടെ സ്വൈര്യം കെടുത്തുന്നു എന്നാണ് ഇദ്ദേഹം പറഞ്ഞിട്ടുള്ളത്.ജേക്കബ്സിന്റെ വാക്കുകൾ ഇങ്ങനെയാണ്.

” ഒരു സീസൺ കൂടി ക്രിസ്റ്റ്യാനോ റൊണാൾഡോ സൗദിയിൽ തന്നെ തുടരും എന്നാണ് ഞാൻ കരുതുന്നത്.ചില വ്യക്തിപരമായ ലക്ഷ്യങ്ങൾ അദ്ദേഹത്തിനുണ്ട്.എന്നാൽ പലപ്പോഴും അദ്ദേഹത്തിന്റെ ഈഗോ പ്രകടമാകുന്നു. എതിർ ആരാധകർ ലയണൽ മെസ്സിയുടെ പേര് ചാന്റ് ചെയ്യുമ്പോഴാണ് അദ്ദേഹം തെറ്റായി കൊണ്ട് എന്തെങ്കിലും പ്രവർത്തിക്കുന്നത്. ലയണൽ മെസ്സി സൗദിയിലും അദ്ദേഹത്തെ അലോസരപ്പെടുത്തുന്നു എന്ന് പറയേണ്ടിവരും.ലയണൽ മെസ്സി വേൾഡ് കപ്പ് നേടിയതിനുശേഷം ഇത് വർദ്ധിക്കുകയാണ് ചെയ്തിട്ടുള്ളത്. തീർച്ചയായും കരിയറിന്റെ ഈ സ്റ്റേജിലും ലയണൽ മെസ്സി എന്ന പേര് അദ്ദേഹത്തെ അലോസരപ്പെടുത്തുന്നുണ്ട് “ഇതാണ് അദ്ദേഹം പറഞ്ഞിട്ടുള്ളത്.

ഇതിന് സമാനമായ അനുഭവമാണ് കഴിഞ്ഞ ദിവസം ലയണൽ മെസ്സിക്ക് നേരിടേണ്ടി വന്നത്. മെക്സിക്കൻ ക്ലബ്ബായ മോന്റെറിയുടെ ആരാധകർ ക്രിസ്റ്റ്യാനോ റൊണാൾഡോയുടെ പേര് മെസ്സിക്കെതിരെ ചാന്റ് ചെയ്തിരുന്നു. മത്സരത്തിൽ മോന്റെറി വിജയിക്കുകയും ഇന്റർ മയാമി പുറത്താവുകയുമാണ് ചെയ്തിട്ടുള്ളത്.