മെസ്സി എഫക്ട് തുടരുന്നു, 10 മിനുട്ടിനകം ടിക്കറ്റുകൾ വിറ്റ് തീർന്നു!

സൂപ്പർ താരം ലയണൽ മെസ്സി അമേരിക്കയിലെ തന്റെ തുടക്കം അതിഗംഭീരമാക്കിയിട്ടുണ്ട്.മൂന്ന് മത്സരങ്ങളാണ് മെസ്സി കളിച്ചിട്ടുള്ളത്. അഞ്ച് ഗോളുകളും ഒരു അസിസ്റ്റുമാണ് ലയണൽ മെസ്സി ഈ മത്സരങ്ങളിൽ നിന്ന് നേടിയിട്ടുള്ളത്. മെസ്സിയുടെ ചിറകിലേറി ഈ മൂന്നു മത്സരങ്ങളിലും ഇന്റർ മിയാമി വിജയിക്കുകയും ലീഗ്സ് കപ്പിന്റെ പ്രീ ക്വാർട്ടറിൽ പ്രവേശിക്കുകയും ചെയ്തിട്ടുണ്ട്.

ഇനി പ്രീ ക്വാർട്ടർ മത്സരത്തിൽ ഇന്റർ മിയാമിയുടെ എതിരാളികൾ ഡല്ലസ് എഫ്സിയാണ്. ഓഗസ്റ്റ് ഏഴാം തീയതി പുലർച്ചെ ഇന്ത്യൻ സമയം 5:30നാണ് ഈയൊരു മത്സരം അരങ്ങേറുക.ഡല്ലസ് എഫ്സിയുടെ മൈതാനമായ ടൊയോട്ട സ്റ്റേഡിയത്തിൽ വെച്ചാണ് ഈ മത്സരം നടക്കുക. ലയണൽ മെസ്സിയുടെ ആദ്യ എവേ മത്സരമാണിത്. ഈ മത്സരത്തിനുള്ള ടിക്കറ്റുകൾ 10 മിനിട്ടിനകം തന്നെ വിറ്റ് തീർന്നു എന്ന റിപ്പോർട്ടുകളാണ് ഇപ്പോൾ പുറത്തേക്ക് വരുന്നത്.

ബ്ലുംബർഗിനെ ഉദ്ധരിച്ചുകൊണ്ട് ഗോൾ ഡോട്ട് കോമാണ് ഇക്കാര്യം റിപ്പോർട്ട് ചെയ്തിട്ടുള്ളത്. ഇരുപതിനായിരത്തോളം സീറ്റുകളാണ് ഈ സ്റ്റേഡിയത്തിൽ ഉള്ളത്. 10 മിനിറ്റിനകം തന്നെ ഈ ഇരുപതിനായിരത്തോളം വരുന്ന ടിക്കറ്റുകൾ വിറ്റ് തീർന്നു. മാത്രമല്ല ടിക്കറ്റുകളുടെ വിലയും വർദ്ധിച്ചിട്ടുണ്ട്. ചുരുങ്ങിയത് 299 ഡോളറെങ്കിലും ഒരു ടിക്കറ്റിന് വേണ്ടി ചിലവഴിക്കണം.ഉയർന്ന വിലയായി കൊണ്ടുവരുന്നത് 600 ഡോളറാണ്. എന്നാൽ ബ്ലാക്ക് മാർക്കറ്റിൽ ഇതിലും വലിയ തുകയാണ് ടിക്കറ്റുകൾക്ക് ഉള്ളത്.

ലയണൽ മെസ്സിയുടെ സാന്നിധ്യം തന്നെയാണ് ടിക്കറ്റുകൾ അതിവേഗത്തിൽ വിറ്റുപോവാൻ കാരണമായിട്ടുള്ളത്. എതിരാളികളുടെ മൈതാനത്ത് ഇനി മെസ്സി എങ്ങനെ കളിക്കും എന്നുള്ളതാണ് ആരാധകർക്ക് അറിയേണ്ടത്.എംഎൽഎസിൽ ഇതുവരെ ലയണൽ മെസ്സി തന്നെ അരങ്ങേറ്റം നടത്തിയിട്ടില്ല. ഓഗസ്റ്റ് 21ആം തീയതിയാണ് മെസ്സി എംഎൽഎസിൽ അരങ്ങേറ്റം നടത്തുക.