മെസ്സിയുടെ ഇമ്പാക്ട് അവിശ്വസനീയം :തുറന്നുപറഞ്ഞ് സഹതാരം.

സൂപ്പർ താരം ലയണൽ മെസ്സി ഇന്റർ മിയാമിക്ക് വേണ്ടി തന്റെ രണ്ടാമത്തെ മത്സരം കളിക്കാനുള്ള ഒരുക്കത്തിലാണ്. അരങ്ങേറ്റ മത്സരത്തിൽ തന്നെ ഗോൾ നേടിക്കൊണ്ട് ഇന്റർമിയാമിക്ക് വിജയം നേടിക്കൊടുക്കാൻ മെസ്സിക്ക് കഴിഞ്ഞിരുന്നു. നാളെ നടക്കുന്ന മത്സരത്തിൽ അറ്റ്ലാൻഡ യുണൈറ്റഡാണ് ഇന്റർ മിയാമിയുടെ എതിരാളികൾ. നാളെ പുലർച്ചെ ഇന്ത്യൻ സമയം അഞ്ചുമണിക്ക് ലീഗ്സ് കപ്പിൽ വെച്ച് തന്നെയാണ് ഈ മത്സരം നടക്കുന്നത്.

ഏതായാലും ഈ മത്സരത്തിനു മുന്നോടിയായി ഇന്റർ മിയാമി താരമായ റോബർട്ട് ടൈലർ മെസ്സിയെക്കുറിച്ച് സംസാരിച്ചിട്ടുണ്ട്. ടീമിനകത്തെ മെസ്സിയുടെ ഇമ്പാക്ട് അവിശ്വസനീയം എന്നാണ് ടൈലർ പറഞ്ഞിട്ടുള്ളത്. ലയണൽ മെസ്സി ടീമിനകത്തേക്ക് ഒരുപാട് എനർജി കൊണ്ടുവന്നു എന്നും ടൈലർ കൂട്ടിച്ചേർത്തിട്ടുണ്ട്.അദ്ദേഹത്തിന്റെ വാക്കുകൾ ഇങ്ങനെയാണ്.

” ലയണൽ മെസ്സിയുടെ അരങ്ങേറ്റം ഗംഭീരമായിരുന്നു. ഞാൻ വളരെയധികം ആവേശഭരിതനാണ്.മെസ്സി ടീമിന് അകത്തേക്ക് ഒരുപാട് എനർജി ഇപ്പോൾ കൊണ്ടുവന്നിട്ടുണ്ട്. ട്രെയിനിങ്ങിലും മത്സരത്തിലും ശരിയായ തീരുമാനങ്ങൾ മാത്രമാണ് മെസ്സി എടുക്കാറുള്ളത്.അദ്ദേഹത്തിന്റെ നീക്കങ്ങൾ ഓരോന്നും മികച്ചതാണ്.വിജയിക്കാൻ കഴിഞ്ഞത് മഹത്തരമായ കാര്യമാണ്. ലയണൽ മെസ്സിയുടെ ക്വാളിറ്റി എന്താണ് എന്ന് മനസ്സിലാക്കാൻ ആ ഫ്രീകിക്ക് മാത്രം മതി. മെസ്സിയുടെ ഇമ്പാക്ട് അവിശ്വസനീയമാണ് ” ഇതാണ് റോബർട്ട് ടൈലർ പറഞ്ഞിട്ടുള്ളത്.

നാളെ നടക്കുന്ന മത്സരത്തിൽ ലയണൽ മെസ്സി സ്റ്റാർട്ടിങ് ഇലവനിൽ തന്നെ ഉണ്ടാകും. അദ്ദേഹമായിരിക്കും ഇന്റർമിയാമിയുടെ ക്യാപ്റ്റനാവുക എന്നാണ് പരിശീലകൻ പറഞ്ഞിട്ടുള്ളത്..അർജന്റൈൻ സൂപ്പർ താരമായ തിയാഗോ അൽമേഡ മറുഭാഗത്ത് അറ്റ്ലാൻ യുണൈറ്റഡ് നിരയിൽ ഉണ്ടാവും.