ഇനിയെന്ത്? മെസ്സിക്കൊപ്പമുള്ള ലക്ഷ്യങ്ങൾ പങ്കുവെച്ച് സുവാരസ്‌!

ഉറുഗ്വൻ സൂപ്പർ താരമായ ലൂയിസ് സുവാരസ്‌ ഇനി മുതൽ ഇന്റർ മയാമിക്ക് വേണ്ടിയാണ് കളിക്കുക. കഴിഞ്ഞ ദിവസം അദ്ദേഹം ക്ലബ്ബിനോടൊപ്പം പരിശീലനം ആരംഭിച്ചിട്ടുണ്ട്. തന്റെ സുഹൃത്തായ ലയണൽ മെസ്സിക്കൊപ്പം അദ്ദേഹം ട്രെയിനിങ് ചെയ്യുന്നതിന്റെ വീഡിയോ ഇപ്പോൾ വളരെയധികം വൈറലാണ്.സെർജിയോ ബുസ്ക്കെറ്റ്സ്,ജോർഡി ആൽബ എന്നിവരൊക്കെ തന്നെയും ഇവർക്കൊപ്പം ഉണ്ടായിരുന്നു.

ഏതായാലും കഴിഞ്ഞ സീസണിൽ എംഎൽഎസിന്റെ പ്ലേ ഓഫിലേക്ക് യോഗ്യത നേടാൻ മയാമിക്ക് സാധിച്ചിരുന്നില്ല. സീസണിന്റെ തുടക്കത്തിൽ നടത്തിയ മോശം പ്രകടനമായിരുന്നു അവർക്ക് വിനയായത്.എന്നാൽ ഇത്തവണ കിരീടം നേടുക എന്നുള്ളത് തന്നെയാണ് ഇന്റർ മയാമിയുടെ ലക്ഷ്യം. അത് തന്നെയാണ് സുവാരസിന്റെയും ലക്ഷ്യം. അക്കാര്യം സുവാരസ് തന്നെ തുറന്നു പറഞ്ഞിട്ടുണ്ട്. താരത്തിന്റെ വാക്കുകൾ ഇങ്ങനെയാണ്.

” ഞങ്ങൾക്ക് വിജയങ്ങൾ നേടേണ്ടതുണ്ട്.ആ ആഗ്രഹം ഉണ്ടെന്ന് കളിക്കളത്തിൽ ഞങ്ങൾ തെളിയിക്കുക തന്നെ ചെയ്യും. കഴിഞ്ഞവർഷം ലീഗ് കിരീടം നേടാൻ ഞങ്ങൾക്ക് സാധിച്ചിട്ടില്ല. പക്ഷേ ഇത്തവണത്തെ ഞങ്ങളുടെ ലക്ഷ്യങ്ങളിൽ ഒന്നാണ് എംഎൽഎസ് കിരീടം “ഇതാണ് സുവാരസ് പറഞ്ഞിട്ടുള്ളത്.

മെസ്സി വരുന്നതിനു മുൻപ് ഒരു കിരീടം പോലും നേടാൻ സാധിക്കാത്ത ടീമായിരുന്നു ഇന്റർ മയാമി. എന്നാൽ കഴിഞ്ഞ സീസണിൽ മെസ്സിയുടെ മികവിൽ ലീഗ്സ് കപ്പ് കിരീടം അവർ സ്വന്തമാക്കുകയായിരുന്നു. ഈ സീസണിൽ കൂടുതൽ മികച്ച പ്രകടനം പുറത്തെടുക്കാൻ സാധിക്കും എന്ന പ്രതീക്ഷയിലാണ് ഇന്റർ മയാമി ഉള്ളത്.സുവാരസിന്റെ വരവ് അവരെ കൂടുതൽ ശക്തരാക്കുന്നുണ്ട്.