ലെൻസിനെ വീഴ്തി PSG ചാമ്പ്യന്മാർ….! ഫ്രഞ്ച് ലീഗിൽ 14-ാം കിരീടം
ലെൻസിനെ വീഴ്തി PSG ചാമ്പ്യന്മാർ….! ഫ്രഞ്ച് ലീഗിൽ 14-ാം കിരീടം
ഫ്രഞ്ച് ലീഗ് വണ്ണിൽ വീണ്ടും PSG യുടെ ആധിപത്യം. ആവേശകരമായ മത്സരത്തിൽ ലെൻസിനെ എതിരില്ലാത്ത രണ്ട് ഗോളുകൾക്ക് പരാജയപ്പെടുത്തി പി.എസ്.ജി തങ്ങളുടെ 14-ാം ലീഗ് കിരീടം സ്വന്തമാക്കി. ഇതോടെ ലീഗ് വണ്ണിൽ ഏറ്റവും കൂടുതൽ തവണ ചാമ്പ്യന്മാരാകുന്ന ടീമെന്ന റെക്കോർഡ് പി.എസ്.ജി കൂടുതൽ ശക്തമാക്കി. തുടർച്ചയായ അഞ്ചാം തവണയാണ് ക്ലബ്ബ് ഈ നേട്ടം കൈവരിക്കുന്നത്.
സ്റ്റേഡ് ബൊള്ളാർട്ട്-ഡെലെലിസിൽ നടന്ന നിർണായക മത്സരത്തിൽ ഒരു സമനില മാത്രം മതിയായിരുന്നു പിഎസ്ജിക്ക് കിരീടമുറപ്പിക്കാൻ. 29-ാം മിനിറ്റിൽ ഖ്വിച ക്വാരത്സ്ഖേലിയയാണ് പിഎസ്ജിയെ മുന്നിലെത്തിച്ചത്. ഉസ്മാൻ ഡെംബെലെയുടെ മികച്ച ഇന്റർസെപ്ഷനിൽ നിന്ന് ലഭിച്ച പന്ത് ജോർജിയൻ താരം അനായാസം വലയിലാക്കി. രണ്ടാം പകുതിയിൽ ലെൻസ് തിരിച്ചടിക്കാൻ ശ്രമിച്ചെങ്കിലും ഗോൾകീപ്പർ മാറ്റ്വി സഫോനോവിന്റെ ഉജ്ജ്വല സേവുകൾ പിഎസ്ജിയെ രക്ഷിച്ചു. ഇഞ്ചുറി ടൈമിൽ 18-കാരൻ ഇബ്രാഹിം എംബായെ ക്രോസ് ബാറിൽ തട്ടിത്തെറിച്ച മിന്നുന്ന ഷോട്ടിലൂടെ ജയം 2-0 ആക്കി.
ഈ വിജയത്തോടെ പിഎസ്ജി 76 പോയിന്റുമായി ലീഗിൽ ഒന്നാമതായി. രണ്ടാമതുള്ള ലെൻസിന് 67 പോയിന്റാണുള്ളത്. ഒരു മത്സരം കൂടി ബാക്കിനിൽക്കെ ഒമ്പത് പോയിന്റിന്റെ അപ്രമാദിത്തമാണ് പിഎസ്ജിക്കുള്ളത്. ഇത് പിഎസ്ജിയുടെ തുടർച്ചയായ അഞ്ചാം ലീഗ് കിരീടമാണ്. ലിയോണിന് ശേഷം ഈ നേട്ടം കൈവരിക്കുന്ന രണ്ടാമത്തെ ക്ലബ്ബായി ലൂയിസ് എൻറിക്കെയുടെ ടീം. 2001 മുതൽ 2006 വരെ തുടർച്ചയായി 5 കിരീടം നേടിയ ലിയോണിന്റെ റെക്കോർഡിനൊപ്പമെത്തി പിഎസ്ജി. മൊത്തം 14 കിരീടങ്ങളുമായി ഫ്രാൻസിലെ ഏറ്റവും വിജയകരമായ ക്ലബ്ബ് എന്ന പദവി പിഎസ്ജി കൂടുതൽ ശക്തമാക്കി.
യുവേഫ ചാമ്പ്യൻസ് ലീഗിൽ തുടർച്ചയായ രണ്ടാം ഫൈനലിൽ എത്തിയ പിഎസ്ജിക്ക് ലീഗിൽ കാര്യങ്ങൾ എളുപ്പമായിരുന്നില്ല. ലിയോൺ, മൊണാക്കോ, മാഴ്സെയ്, റെന്നെ എന്നിവരോട് തോൽക്കുകയും അഞ്ച് മത്സരങ്ങൾ സമനിലയാക്കുകയും ചെയ്തു. എന്നാൽ അവസാന നാല് കളിയിൽ മൂന്നും ജയിച്ച് കിരീടം ഉറപ്പിച്ചു.
ഈ സീസണിൽ യുവേഫ സൂപ്പർ കപ്പ്, ഫിഫ ഇന്റർകോണ്ടിനെന്റൽ കപ്പ്, ഫ്രഞ്ച് ചാമ്പ്യൻസ് ട്രോഫി എന്നിവ ഇതിനകം നേടിയ പിഎസ്ജി, മെയ് 30-ന് ബുഡാപെസ്റ്റിൽ ആഴ്സണലിനെതിരെ ചാമ്പ്യൻസ് ലീഗ് കിരീടം നിലനിർത്താനിറങ്ങും. ജയിച്ചാൽ തുടർച്ചയായി രണ്ട് യൂറോപ്യൻ കപ്പ് നേടുന്ന രണ്ടാമത്തെ ആധുനിക ടീമായി പിഎസ്ജി മാറും. ലെൻസാകട്ടെ, രണ്ടാം സ്ഥാനം ഉറപ്പിച്ച് അടുത്ത സീസണിലെ ചാമ്പ്യൻസ് ലീഗിന് യോഗ്യത നേടി. മെയ് 22-ന് നീസിനെതിരെ ഫ്രഞ്ച് കപ്പ് ഫൈനലും അവർ കളിക്കും. ഇനിയും PSG യുടെ മുന്നേറ്റങ്ങൾക്കായി കാത്തിരിക്കുകയാണ് ആരാധകർ.
