മെസ്സി- നെയ്മർ കൂട്ടുകെട്ടിന്റെ മികവിൽ വിജയിച്ചു കയറി PSG!

ലീഗ് വണ്ണിൽ ഒരല്പം മുമ്പ് നടന്ന ഏഴാം റൗണ്ട് പോരാട്ടത്തിൽ വമ്പൻമാരായ പിഎസ്ജിക്ക് വിജയം. സ്വന്തം മൈതാനത്ത് വെച്ച് നടന്ന മത്സരത്തിൽ എതിരില്ലാത്ത ഒരു ഗോളിനാണ് പിഎസ്ജി ബ്രെസ്റ്റിനെ പരാജയപ്പെടുത്തിയത്.സൂപ്പർതാരം നെയ്മർ ജൂനിയറുടെ ഗോളാണ് പിഎസ്ജിയുടെ രക്ഷക്കെത്തിയത്.

മെസ്സി, നെയ്മർ,എംബപ്പേ എന്നിവരായിരുന്നു ടീമിന്റെ മുന്നേറ്റങ്ങൾ നയിച്ചിരുന്നത്. മത്സരത്തിന്റെ ഇരുപതാം മിനിറ്റിൽ മെസ്സിയുടെ ഒരു തകർപ്പൻ ഷോട്ട് ഉണ്ടായിരുന്നെങ്കിൽ എംബപ്പേയുടെ കാലിൽ തട്ടിക്കൊണ്ട് ലക്ഷ്യത്തിൽ നിന്നും അകന്നു പോവുകയായിരുന്നു. മുപ്പതാം മിനിട്ടിലാണ് നെയ്മറുടെ ഗോൾ പിറക്കുന്നത്. മെസ്സിയുടെ അസാധാരണമായ പാസിൽ നിന്നും നെയ്മർ ഗംഭീരമായ ഫിനിഷ് ചെയ്യുകയായിരുന്നു. ഈ സീസണിൽ നെയ്മർ നേടുന്ന 10 ആമത്തെ ഗോളും മെസ്സി നേടുന്ന ഏഴാമത്തെ അസിസ്റ്റുമാണ് ഇത്.

പിന്നീട് മത്സരത്തിന്റെ 71ആം മിനുട്ടിൽ ബ്രെസ്റ്റിന് അനുകൂലമായി ഒരു പെനാൽറ്റി ലഭിച്ചു. എന്നാൽ PSG ഗോൾകീപ്പർ ഡോണ്ണാരുമ രക്ഷകനാവുകയായിരുന്നു.സ്ലിമാനിയുടെ പെനാൽറ്റി ഡോണ്ണാരുമ സേവ് ചെയ്യുകയായിരുന്നു. പിന്നീട് ടീമുകൾക്കും ഒന്നും ചെയ്യാൻ കഴിയാതെ വന്നതോടെ എതിരില്ലാത്ത ഒരു ഗോളിന് PSG വിജയിച്ചു കയറി.

7 മത്സരങ്ങളിൽ നിന്ന് 19 പോയിന്റുള്ള PSG ഒന്നാം സ്ഥാനത്ത് തന്നെയാണ്. ഇനി ചാമ്പ്യൻസ് ലീഗിൽ മക്കാബി ഹൈഫയെയാണ് PSG നേരിടുക.