മെസ്സിയും എംബപ്പേയും പൊളിച്ചടുക്കി, തകർപ്പൻ വിജയത്തോടെ പിഎസ്ജി!

ഇന്നലെ ലീഗ് വണ്ണിൽ നടന്ന മത്സരത്തിൽ നിലവിലെ ചാമ്പ്യന്മാരായ പിഎസ്ജിക്ക് തകർപ്പൻ വിജയം. എതിരില്ലാത്ത മൂന്ന് ഗോളുകൾക്കാണ് പിഎസ്ജി അജാക്സിയോയെ പരാജയപ്പെടുത്തിയത്.സൂപ്പർ താരങ്ങളായ ലയണൽ മെസ്സി,കിലിയൻ എംബപ്പേ എന്നിവരുടെ കൂട്ടുകെട്ടിന്റെ മികവിലാണ് ഈ മിന്നും വിജയം പിഎസ്ജി കരസ്ഥമാക്കിയിട്ടുള്ളത്.

കിലിയൻ എംബപ്പേ രണ്ട് ഗോളുകളും ഒരു അസിസ്റ്റും നേടിയപ്പോൾ ലയണൽ മെസ്സി ഒരു ഗോളും രണ്ട് അസിസ്റ്റുമാണ് കരസ്ഥമാക്കിയിട്ടുള്ളത്. മത്സരത്തിന്റെ 24ആം മിനിട്ടിലാണ് എംബപ്പേ ആദ്യ ഗോൾ നേടുന്നത്.മെസ്സിയുടെ അസിസ്റ്റിൽ നിന്നായിരുന്നു ആ ഗോൾ. പിന്നീട് രണ്ടാം പകുതിയിൽ മെസ്സിയുടെ ഗോൾ പിറന്നു.എംബപ്പേയുടെ മനോഹരമായ പാസിൽ നിന്നും ഗോൾകീപ്പറേ കബളിപ്പിച്ചു കൊണ്ടാണ് മെസ്സി ഈ ഗോൾ കരസ്ഥമാക്കിയത്.

82ആം മിനുറ്റിൽ എംബപ്പേ വീണ്ടും നിറയൊഴിച്ചു.ഇത്തവണയും ഈ ഗോളിന് വഴി ഒരുക്കിയത് ലയണൽ മെസ്സി തന്നെയായിരുന്നു. അതായത് പിഎസ്ജി നേടിയ 3 ഗോളുകളിലും മെസ്സിയുടെയും എംബപ്പേയുടെയും പങ്കാളിത്തം ഉണ്ടായിരുന്നു. സൂപ്പർ താരങ്ങളായ നെയ്മർ ജൂനിയർ,സെർജിയോ റാമോസ് എന്നിവരുടെ അഭാവത്തിൽ ആയിരുന്നു ഈ മത്സരത്തിൽ പിഎസ്ജി ഇറങ്ങിയിരുന്നത്.

നിലവിൽ പിഎസ്ജി ഒന്നാം സ്ഥാനത്തു തന്നെയാണ്.12 മത്സരങ്ങളിൽ നിന്ന് 32 പോയിന്റാണ് പിഎസ്ജിയുടെ സമ്പാദ്യം. ഒരു മത്സരം കുറച്ച് കളിച്ചുകൊണ്ട് 26 പോയിന്റുള്ള ലോറിയന്റാണ് രണ്ടാം സ്ഥാനത്ത് ഉള്ളത്.ഇനി പിഎസ്ജി അടുത്ത ചാമ്പ്യൻസ് ലീഗ് മത്സരത്തിൽ മക്കാബി ഹൈഫയെയാണ് നേരിടുക.