ഫ്രഞ്ച് പ്രസിഡന്റിന് വേണ്ടിയുള്ള വോട്ടെടുപ്പ്, അമ്പരപ്പുണ്ടാക്കി എംബപ്പേക്ക് ലഭിച്ച 10 വോട്ടുകൾ!

ഈ സീസണിൽ മിന്നുന്ന ഫോമിലാണ് പിഎസ്ജിയുടെ ഫ്രഞ്ച് സൂപ്പർതാരമായ കിലിയൻ എംബപ്പേ കളിച്ചു കൊണ്ടിരിക്കുന്നത്.ഈ ലീഗ് വണ്ണിൽ ഏറ്റവും കൂടുതൽ ഗോളുകളും ഏറ്റവും കൂടുതൽ അസിസ്റ്റുകളും നേടിയ താരം എംബപ്പേയാണ്.പിഎസ്ജി ആരാധകരുടെയും ഫ്രഞ്ച് ആരാധകരുടേയും വളരെ പ്രിയപ്പെട്ട താരമാണ് കിലിയൻ എംബപ്പേ.

ഇപ്പോഴിതാ താരവുമായി ബന്ധപ്പെട്ട വളരെ രസകരമായ ഒരു വാർത്തയാണ് പുറത്തേക്ക് വന്നിട്ടുള്ളത്.നിലവിൽ ഫ്രാൻസിൽ പ്രസിഡണ്ടിനെ കണ്ടെത്താനുള്ള വോട്ടെടുപ്പ് പുരോഗമിച്ചുകൊണ്ടിരിക്കുന്ന ഒരു സമയമാണിത്. കഴിഞ്ഞ ദിവസമായിരുന്നു രണ്ടാംഘട്ട വോട്ടെടുപ്പ് പൂർത്തിയായത്.ഫ്രാൻസിലെ ടാളെനെയ് എന്ന പ്രദേശത്തെ ഈസ്റ്റേൺ വില്ലേജിലെ വോട്ടുകൾ എണ്ണിയ അധികൃതർ ശരിക്കും ഞെട്ടുകയായിരുന്നു.

എന്തെന്നാൽ സൂപ്പർതാരമായ കിലിയൻ എംബപ്പേക്ക് 10 വോട്ടുകളാണ് ലഭിച്ചിട്ടുള്ളത്.അതായത് താരത്തിന്റെ പേര് രേഖപ്പെടുത്തിക്കൊണ്ട് മുൻകൂട്ടി തയ്യാറാക്കിയ ബാലറ്റ് പേപ്പറുകൾ ഇവർ ബാലറ്റ് പെട്ടിയിൽ നിക്ഷേപിക്കുകയായിരുന്നു.348 വോട്ടുകളായിരുന്നു അവിടെ രജിസ്റ്റർ ചെയ്യപ്പെട്ടിരുന്നത്.ഏതായാലും ഈ പത്ത് വോട്ടുകളും അസാധുവാകുകയായിരുന്നു.

ഇമ്മാനുവൽ മക്രോൺ,മറൈൻ ലേ എന്നിവരാണ് ഫ്രാൻസിന്റെ പ്രസിഡന്റ് സ്ഥാനത്തേക്ക് വേണ്ടി ശക്തമായി മത്സരിക്കുന്നത്.ഏതായാലും എംബപ്പേക്ക് ലഭിച്ച ഈ വോട്ടുകൾ പലരിലും കൗതുകമുണർത്തിയിരിക്കുകയാണ്.