പിഎസ്ജി സൂപ്പർ താരത്തെ ടീമിലെത്തിക്കണം, നീക്കമാരംഭിച്ച് സ്പാനിഷ് വമ്പൻമാർ!

ഈ സീസണിലായിരുന്നു ഡച്ച് സൂപ്പർ താരം വൈനാൾഡം ലിവർപൂൾ വിട്ടു കൊണ്ട് പിഎസ്ജിയിൽ എത്തിയത്. എന്നാൽ താരം ഉദ്ദേശിച്ചത് പോലെയല്ല പിഎസ്‌ജിയിൽ കാര്യങ്ങൾ പുരോഗമിച്ചത്. സ്റ്റാർട്ടിങ് ഇലവനുകളിൽ വേണ്ടത്ര അവസരങ്ങൾ വൈനാൾഡത്തിന് ലഭിച്ചിരുന്നില്ല. ഇതോടെ താരം പിഎസ്ജിയിൽ അതൃപ്തി അറിയിച്ചിരുന്നു. മാത്രമല്ല ക്ലബ് വിടാനുള്ള ശ്രമങ്ങൾ ആരംഭിക്കുകയും ചെയ്തിരുന്നു.

താരത്തിന് വേണ്ടി ഒട്ടേറെ പ്രീമിയർ ലീഗ് ക്ലബുകൾ രംഗത്ത് വന്നിരുന്നു. ആഴ്സണലും ന്യൂ കാസിൽ യുണൈറ്റഡുമൊക്കെ അതിൽ പെട്ടവരായിരുന്നു. ഇപ്പോഴിതാ നിലവിലെ ലാലിഗ ചാമ്പ്യൻമാരായ അത്ലറ്റിക്കോ മാഡ്രിഡും വൈനാൾഡത്തിൽ താല്പര്യം പ്രകടിപ്പിച്ചിട്ടുണ്ട്. താരത്തിന് വേണ്ടി അത്ലറ്റിക്കോ നീക്കങ്ങൾ ആരംഭിച്ചു എന്നാണ് ടോഡോഫിഷാജസ് റിപ്പോർട്ട്‌ ചെയ്യുന്നത്. ഈ ജനുവരി ട്രാൻസ്ഫർ ജാലകത്തിൽ വാങ്ങാനുള്ള ഓപ്ഷൻ ഉൾപ്പെടുത്തിയുള്ള ലോൺ അടിസ്ഥാനത്തിൽ ടീമിലേക്ക് എത്തിക്കാനാണ് നിലവിൽ അത്ലറ്റിക്കോയുടെ പദ്ധതി. പക്ഷേ പിഎസ്ജി ഏത് രൂപത്തിലുള്ള നിലപാട് സ്വീകരിക്കുമെന്നുള്ളത് വ്യക്തമല്ല.

ഈ സീസണിൽ ആകെ 21 മത്സരങ്ങൾ പിഎസ്ജിക്കായി വൈനാൾഡം കളിച്ചിട്ടുണ്ട്. പക്ഷേ പല മത്സരങ്ങളിലും പകരക്കാരന്റെ രൂപത്തിലായിരുന്നു താരം കളിച്ചിരുന്നത്.മൂന്ന് ഗോളുകളും താരം നേടിയിട്ടുണ്ട്. പക്ഷേ അർഹിച്ച പിഎസ്ജിയിൽ ലഭിക്കുന്നില്ല എന്നുള്ള കാര്യം വൈനാൾഡം തന്നെ തുറന്ന് പറഞ്ഞിരുന്നു.നിലവിൽ രണ്ട് വർഷം കൂടി താരത്തിന് പിഎസ്ജിയിൽ കരാർ അവശേഷിക്കുന്നുണ്ട്. താരത്തെ പിഎസ്ജി കൈവിടുമോ എന്നുള്ളത് കണ്ടറിയേണ്ട കാര്യമാണ്.