പിഎസ്ജിയുടെ ഇന്നത്തെ മത്സരത്തിന് എന്ത്കൊണ്ട് മെസ്സിയില്ല?

ഇന്ന് കോപ ഡി ഫ്രാൻസിൽ നടക്കുന്ന റൗണ്ട് 32ൽ കരുത്തരായ പിഎസ്ജി കളത്തിലേക്ക് ഇറങ്ങുന്നുണ്ട്.പയ്സ് ഡി കാസലാണ് പിഎസ്ജിയുടെ എതിരാളികൾ. ഇന്ന് രാത്രി ഇന്ത്യൻ സമയം 1:15നാണ് ഈയൊരു മത്സരം നടക്കുക.പിഎസ്ജിയെ സംബന്ധിച്ചിടത്തോളം ഇതൊരു എവേ മത്സരമാണ്.

ഈ മത്സരത്തിനുള്ള സ്‌ക്വാഡ് കഴിഞ്ഞ ദിവസം ക്ലബ്ബ് പ്രഖ്യാപിച്ചിരുന്നു. സൂപ്പർ താരം ലയണൽ മെസ്സിക്ക് ഈ സ്‌ക്വാഡിൽ ഇടം നേടാൻ സാധിച്ചിട്ടില്ല. അതേസമയം മറ്റു സൂപ്പർതാരങ്ങളായ കിലിയൻ എംബപ്പേയും നെയ്മർ ജൂനിയറുമൊക്കെ ടീമിൽ ഇടം കണ്ടെത്തിയിട്ടുണ്ട്.

ലയണൽ മെസ്സിയെ ഒഴിവാക്കാൻ കാരണം പിഎസ്ജിയുടെ പരിശീലകനായ ഗാൾട്ടിയർ അദ്ദേഹത്തിന് വിശ്രമം നൽകാൻ തീരുമാനിച്ചു എന്നുള്ളതാണ്. ഫെബ്രുവരി പതിനാലാം തീയതി ചാമ്പ്യൻസ് ലീഗിന്റെ പ്രീ ക്വാർട്ടറിൽ പിഎസ്ജിയുടെ എതിരാളികൾ വമ്പൻമാരായ ബയേൺ മ്യൂണികാണ്. ആ മത്സരത്തിനു മുന്നേ സാധ്യമായ രീതിയിൽ മെസ്സിക്ക് വിശ്രമം നൽകാനാണ് പരിശീലകൻ ഉദ്ദേശിക്കുന്നത്. അതിന്റെ ഭാഗമായി കൊണ്ടാണ് ഇപ്പോൾ വിശ്രമം നൽകിയിരിക്കുന്നത്.

കഴിഞ്ഞ സൗഹൃദ മത്സരത്തിൽ മെസ്സി റിയാദിനെതിരെ കളിച്ചിരുന്നു. ഒരു ഗോൾ കണ്ടെത്തുകയും ചെയ്തിരുന്നു.ലീഗ് വണ്ണിൽ ഇനി പിഎസ്ജിയുടെ എതിരാളികൾ റെയിംസാണ്. ആ മത്സരത്തിൽ മെസ്സി കളിക്കും എന്നാണ് പ്രതീക്ഷിക്കപ്പെടുന്നത്.