ക്രിസ്റ്റ്യാനോയും റൊമാരിയോയും മാത്രം കരസ്ഥമാക്കിയിട്ടുള്ള റെക്കോർഡ് സ്വന്തമാക്കി നെയ്മർ!

കഴിഞ്ഞ ദിവസം ലീഗ് വണ്ണിൽ നടന്ന മത്സരത്തിൽ പിഎസ്ജി മെറ്റ്സിനെ എതിരില്ലാത്ത അഞ്ച് ഗോളുകൾക്ക് തകർത്തു വിട്ടിരുന്നു. സൂപ്പർ താരം കിലിയൻ എംബപ്പേയുടെ ഹാട്രിക്കാണ് പിഎസ്ജിക്ക് ഇത്തരത്തിലുള്ള ഒരു വിജയം സമ്മാനിച്ചത്.ശേഷിച്ച ഗോളുകൾ ഡി മരിയ,നെയ്മർ എന്നിവരാണ് നേടിയത്.

ഈ ഗോൾ നേട്ടത്തോട് കൂടി പിഎസ്ജിക്ക് വേണ്ടി ആകെ 100 ഗോളുകൾ പൂർത്തിയാക്കാൻ സൂപ്പർ താരം നെയ്മർ ജൂനിയർക്ക് സാധിച്ചിട്ടുണ്ട്.പിഎസ്ജിക്ക് വേണ്ടി ഇതുവരെ 144 മത്സരങ്ങളാണ് നെയ്മർ കളിച്ചിട്ടുള്ളത്. അതിൽ നിന്നാണ് 100 ഗോളുകൾ നെയ്മർ പൂർത്തിയാക്കിയിട്ടുള്ളത്.

ഇതോടൊപ്പം മറ്റൊരു ചരിത്രനേട്ടം കൂടി നെയ്മർ സ്വന്തമാക്കിയിട്ടുണ്ട്. അതായത് വ്യത്യസ്തമായ 3 ക്ലബ്ബുകൾക്ക് വേണ്ടി 100 ഗോളുകൾ നേടുന്ന ഫുട്ബോൾ ചരിത്രത്തിലെ മൂന്നാമത്തെ താരമെന്ന റെക്കോർഡാണ് നെയ്മർ സ്വന്തമാക്കിയിട്ടുള്ളത്. ക്രിസ്റ്റ്യാനോ റൊണാൾഡോ,റൊമാരിയോ എന്നിവരാണ് ഇതിനു മുൻപ് ഈ നേട്ടം കരസ്ഥമാക്കിയിട്ടുള്ളത്.

സാന്റോസിന് വേണ്ടി 225 മത്സരങ്ങളിൽ നിന്ന് 136 ഗോളുകളാണ് നെയ്മർ നേടിയിട്ടുള്ളത്.ബാഴ്സക്ക് വേണ്ടി 186 മത്സരങ്ങളിൽ നിന്ന് 105 ഗോളുകൾ നേടാനും നെയ്മർക്ക് കഴിഞ്ഞിട്ടുണ്ട്. മാത്രമല്ല ഈ മൂന്ന് ക്ലബ്ബുകൾക്ക് വേണ്ടിയും 50 ൽ പരം അസിസ്റ്റുകളും നെയ്മർ ജൂനിയർ കരസ്ഥമാക്കിയിട്ടുണ്ട്.

മാഞ്ചസ്റ്റർ യുണൈറ്റഡ്, റയൽ മാഡ്രിഡ്,യുവന്റസ് എന്നീ ക്ലബ്ബുകൾക്ക് വേണ്ടിയാണ് ക്രിസ്റ്റ്യാനോ റൊണാൾഡോ നൂറു ഗോളുകൾ തികച്ചിട്ടുള്ളത്. അതേസമയം പിഎസ്വി ഐന്തോവൻ,വാസ്ക്കോ ഡ ഗാമ,ഫ്ലമെൻകോ എന്നീ ക്ലബ്ബുകൾക്ക് വേണ്ടിയാണ് റൊമാരിയോ നൂറു ഗോളുകൾ നേടിയിട്ടുള്ളത്. ഈ ഇതിഹാസങ്ങളുടെ കൂട്ടത്തിലേക്കാണ് ഇപ്പോൾ നെയ്മർ ജൂനിയറും നടന്നു കയറിയിട്ടുള്ളത്.