ഈ അവസ്ഥയിൽ ബാഴ്സയിലേക്ക് പോവുന്നതിനെ കുറിച്ച് നെയ്മർ ചിന്തിക്കരുതെന്ന് റിവാൾഡോ !

സൂപ്പർ താരം നെയ്മർ ജൂനിയർക്ക് ഉപദേശവുമായി മുൻ ബ്രസീൽ-ബാഴ്സ ഇതിഹാസം റിവാൾഡോ. കഴിഞ്ഞ ദിവസം ബെറ്റ്ഫയറിന് നൽകിയ അഭിമുഖത്തിലാണ് റിവാൾഡോ നെയ്മറിന് ഉപദേശം നൽകിയത്. ഈയൊരു അവസ്ഥയിൽ ബാഴ്സയിലേക്ക് പോവുന്നതിനെ കുറിച്ച് ചിന്തിക്കുക പോലും ചെയ്യരുതെന്നായിരുന്നു റിവാൾഡോ പറഞ്ഞത്. നെയ്മർ പിഎസ്ജിയിൽ തന്നെ തുടരണമെന്നും ഇപ്പോൾ ആരാധകരുടെ പിന്തുണയും സ്നേഹവും പിടിച്ചു പറ്റാൻ നെയ്മർക്ക് കഴിഞ്ഞിട്ടുണ്ടെന്നും റിവാൾഡോ അറിയിച്ചു. നെയ്മർ പിഎസ്ജിയിൽ തന്നെ തുടരാൻ എടുത്ത തീരുമാനം ശരിയാണെന്നു വിശ്വസിക്കുന്ന റിവാൾഡോ താരത്തിനോട് കളിയിൽ കൂടുതൽ ശ്രദ്ധ കേന്ദ്രീകരിക്കാൻ നെയ്‌മർക്ക് കഴിഞ്ഞിട്ടുണ്ടെന്നും അറിയിച്ചു. മുമ്പ് ലെ പാരീസിയന് നൽകിയ അഭിമുഖത്തിൽ താൻ പിഎസ്ജിയിൽ തന്നെ തുടരുമെന്നും താൻ സന്തോഷവാനാണ് എന്നും നെയ്മർ വെളിപ്പെടുത്തിയിരുന്നു.

” പിഎസ്ജിയിൽ എത്തിയതിനു ശേഷം എന്തൊക്കെ നടന്നിട്ടുണ്ടെങ്കിലും, മൂന്ന് വർഷത്തിന് ശേഷം തന്റെ ടീമിനെ ചാമ്പ്യൻസ് ലീഗ് ഫൈനലിൽ എത്തിച്ചതിന് നെയ്മർ അഭിനന്ദനങ്ങൾ അർഹിക്കുന്നുണ്ട്. അദ്ദേഹം ബാഴ്സയിലേക്ക് മടങ്ങാൻ ശ്രമിച്ച ശേഷം നെയ്മർക്ക് ഫ്രാൻസിൽ ഏറെ ബുദ്ധിമുട്ടേറിയ സമയങ്ങളായിരുന്നു ഉണ്ടായിരുന്നത്. ആരാധകർ സ്വന്തം മൈതാനത്ത് അദ്ദേഹത്തെ കൂവി വിളിക്കുക വരെ ചെയ്തു. പക്ഷെ അദ്ദേഹം ഇപ്പോൾ കാര്യങ്ങളെ മാറ്റി മറിച്ചു. ഇപ്പോൾ അവർ നെയ്മറെ ആരാധിക്കുന്നു. ഇപ്പോൾ അദ്ദേഹത്തിന് കളിയിൽ കൂടുതൽ ശ്രദ്ധ കേന്ദ്രീകരിക്കാൻ കഴിഞ്ഞിട്ടുണ്ട് അതിനാൽ തന്നെ ആരാധകർ അദ്ദേഹത്തെ ഇഷ്ടപ്പെടുന്നു. നിലവിൽ അദ്ദേഹത്തിന് പിഎസ്ജി വിടാനുള്ള ഒരു കാരണവുമില്ല. അത്കൊണ്ട് തന്നെ നിലവിൽ, പ്രത്യേകിച്ച് ബാഴ്സയിലേക്ക് പോവുന്നതിനെ കുറിച്ച് നെയ്മർ ആലോചിക്കരുത് ” റിവാൾഡോ പറഞ്ഞു.