ഹാലണ്ട് റയലിലേക്കെത്തുമെന്ന അഭ്യൂഹങ്ങളെ ശക്തമാക്കി പുതിയ സൂചനകൾ!

കഴിഞ്ഞ ചാമ്പ്യൻസ് ലീഗ് മത്സരത്തിൽ ഇരട്ടഗോളുകൾ നേടിക്കൊണ്ടാണ് എർലിങ് ഹാലണ്ട് തന്റെ ടീമായ ബൊറൂസിയ ഡോർട്മുണ്ടിനെ ചുമലിലേറ്റിയത്. മത്സരത്തിൽ സെവിയ്യയെ ബൊറൂസിയ കീഴ്ടക്കുകയും ചെയ്തു. സെവിയ്യയുടെ മൈതാനത്ത് വെച്ചാണ് താരം ഇരട്ടഗോളുകൾ സ്വന്തം പേരിലാക്കിയത്. ഈ മത്സരത്തിന് ശേഷം താൻ റയൽ മാഡ്രിഡിനെ ഇഷ്ടപ്പെടുന്നു എന്നുള്ളതിന്റെ സൂചനകൾ നൽയിരിക്കുകയാണ് ഹാലണ്ട്.മത്സരത്തിന് മുന്നേ തന്റെ ഹോട്ടലിന് മുന്നിൽ എത്തിയ എല്ലാ ആരാധകർക്കുമൊപ്പവും ഫോട്ടോ എടുക്കാൻ ഹാലണ്ട് സമ്മതിച്ചിരുന്നു. ഇക്കാര്യം സ്പാനിഷ് മാധ്യമമായ ഡയാറിയോ എഎസ് ആയിരുന്നു റിപ്പോർട്ട്‌ ചെയ്തിരുന്നത്. ഇതിൽ പലരും റയൽ മാഡ്രിഡ്‌ ആരാധകർ ആയിരുന്നുവെന്നും എഎസ് സൂചിപ്പിക്കുന്നുണ്ട്. ഇതേകുറിച്ച് ഹാലണ്ടിനോട് തന്നെ ചോദിക്കപ്പെട്ടിരുന്നു. ഇതിന് മറുപടിയായാണ് ഹാലണ്ട് തന്റെ ഇഷ്ടം തുറന്നു പറഞ്ഞത്.

” അവർ എന്നെ ഇഷ്ടപ്പെടുന്നു എന്നുള്ളത് നല്ല കാര്യമാണ് ” എന്നാണ് റയൽ മാഡ്രിഡ്‌ ആരാധകരെ കുറിച്ച് ഹാലണ്ട് പറഞ്ഞത്. ഇതിന് മുമ്പും ഒരുപാട് സൂചനകൾ ഉണ്ടായിട്ടുണ്ട്.സ്പാനിഷ് ഫുട്ബോളിനെയും മാഡ്രിഡിനെയും കുറിച്ച് ഹാലണ്ട് പലപ്പോഴും പോസിറ്റീവ് ആയ രൂപത്തിലായിരുന്നു സംസാരിച്ചിരുന്നത്. മാത്രമല്ല ട്വിറ്ററിൽ വിനീഷ്യസ് ജൂനിയറുമായി നല്ല ബന്ധമാണ് ഹാലണ്ട് പുലർത്തുന്നത്.കൂടാതെ ഹാലണ്ടിന്റെ പിതാവ് പലപ്പോഴും ലാലിഗയെ കുറിച്ചും റയൽ മാഡ്രിഡ്‌ താരങ്ങളെ കുറിച്ചും സംസാരിക്കാറുണ്ടായിരുന്നു.ലുകാസ് വാസ്‌ക്കസ്, മാർക്കോ അസെൻസിയോ, റാമോസ് എന്നിവരെ കുറിച്ചെല്ലാം ഹാലണ്ടിന്റെ പിതാവ് സംസാരിച്ചിട്ടുണ്ട്. കൂടാതെ സിദാനോടുള്ള ആരാധനയും ഇദ്ദേഹം മുമ്പ് വെളിപ്പെടുത്തിയിട്ടുണ്ട്.