ഹാലണ്ട് ബാഴ്‌സയിലെത്തുമെന്ന് പ്രതീക്ഷിക്കുന്നു : പിക്വേ!

ഈ ട്രാൻസ്ഫർ ജാലകത്തിൽ എഫ്സി ബാഴ്സലോണ ലക്ഷ്യം വെക്കുന്ന സൂപ്പർ താരമാണ് എർലിങ് ഹാലണ്ട്. സാമ്പത്തികപരമായ ക്ലേശങ്ങൾ മാത്രമാണ് ബാഴ്‌സക്ക് ഇതിന് തടസ്സമായി നിലകൊള്ളുന്നത്. താരത്തിന് വേണ്ടി ഭീമൻ തുകയാണ് ബൊറൂസിയ ഡോർട്മുണ്ട് ആവിശ്യപ്പെടുന്നത്. എന്നിരുന്നാലും പ്രസിഡന്റ്‌ ലാപോർട്ട ഹാലണ്ടിന് വേണ്ടിയുള്ള ശ്രമങ്ങൾ തുടരുകയാണ്. ഇതിനിടെ ഹാലണ്ട് ബാഴ്‌സയിലേക്കെത്തുമെന്നുള്ള തന്റെ പ്രതീക്ഷ പങ്കുവെച്ചിരിക്കുകയാണ് ബാഴ്‌സ സൂപ്പർ താരം ജെറാർഡ് പിക്വേ.മാധ്യമപ്രവർത്തകൻ ഇബൈ ലാനോസിന് നൽകിയ അഭിമുഖത്തിലാണ് പിക്വേ ഇക്കാര്യം പങ്കുവെച്ചത്.കൂടാതെ പുതുതായി ടീമിലെത്തിയ സെർജിയോ അഗ്വേറോയെ പറ്റിയും പിക്വേ സംസാരിച്ചു.

” എർലിങ് ഹാലണ്ട് ബാഴ്‌സയിലേക്ക് എത്തുമോ എന്ന കാര്യത്തെ കുറിച്ച് എനിക്ക് യാതൊരു വിധ ധാരണയുമില്ല. പക്ഷേ അദ്ദേഹം ബാഴ്‌സയിലെത്തുമെന്നാണ് ഞാൻ പ്രതീക്ഷിക്കുന്നത്.മികച്ച താരങ്ങൾ ഞങ്ങളോടൊപ്പമുണ്ടാവാൻ ഞങ്ങൾ ആഗ്രഹിക്കുന്നു. പക്ഷേ അത്‌ ക്ലബാണ് തീരുമാനിക്കേണ്ടത്.അവർക്കാണ് അതിനെ കുറിച്ചറിയുക.അഗ്വേറോയുമായി എനിക്ക് ആദ്യമേ ബന്ധമുണ്ട്. സോഷ്യൽ മീഡിയ വഴി ഞങ്ങൾ ബന്ധം പുലർത്താറുണ്ട്.അണ്ടർ 20 വേൾഡ് കപ്പിൽ ഞാൻ അദ്ദേഹത്തിനെതിരെ കളിച്ചിട്ടുണ്ടായിരുന്നു.ഞങ്ങൾ ഒരേ ജെനറേഷനിൽ ഉള്ളവരാണ്. മെസ്സി അദ്ദേഹത്തെ കുറിച്ച് ഒരുപാട് സംസാരിക്കാറുമുണ്ട് ” പിക്വേ പറഞ്ഞു.