ഹാട്രിക്കുമായി അസെൻസിയോ, ഗോളിലാറാടി റയൽ!

ലാലിഗയിൽ നടന്ന ആറാം റൗണ്ട് പോരാട്ടത്തിൽ റയലിന് തകർപ്പൻ ജയം. ഒന്നിനെതിരെ ആറ് ഗോളുകൾക്ക്‌ റയൽ മയ്യോർക്കയെയാണ് തകർത്തു വിട്ടത്. ഹാട്രിക് നേടിയ സൂപ്പർ താരം അസെൻസിയോയും രണ്ട് ഗോളുകളും രണ്ട് അസിസ്റ്റുകളും നേടിയ ബെൻസിമയുമാണ് റയലിന് തകർപ്പൻ ജയം സ്വന്തമാക്കിയത്. ബെൻസിമ ഇരട്ട ഗോളുകൾ നേടിയപ്പോൾ ശേഷിച്ച ഗോൾ ഇസ്കോയാണ് നേടിയത്.ജയത്തോടെ റയൽ ലീഗിലെ ഒന്നാം സ്ഥാനം ഭദ്രമാക്കി.ആറ് മത്സരങ്ങളിൽ നിന്ന് 16 പോയിന്റാണ് റയലിന്റെ സമ്പാദ്യം.

ബെൻസിമ, റോഡ്രിഗോ, വിനീഷ്യസ് എന്നിവരായിരുന്നു മുന്നേറ്റനിരയിൽ.കമവിങ്ക, വാൽവെർദേ, അസെൻസിയോ എന്നിവർ മധ്യനിരയിലും അണിനിരന്നു.മത്സരത്തിന്റെ മൂന്നാം മിനിറ്റിൽ തന്നെ ബെൻസിമ ഗോൾ നേടി.24-ആം മിനുട്ടിൽ അസെൻസിയോ ലീഡ് ഉയർത്തിയെങ്കിലും മയ്യോർക്ക താരം ലീ മത്സരം 2-1 ആക്കി.എന്നാൽ 29-ആം മിനുട്ടിൽ ബെൻസിമയുടെ അസിസ്റ്റിൽ നിന്ന് അസെൻസിയോ റയലിന്റെ ലീഡ് വർധിപ്പിച്ചു.49-ആം മിനുട്ടിൽ ബെൻസിമ ഗോൾ നേടിയെങ്കിലും ഫൗൾ മൂലം അത് അസാധുവാക്കി.55-ആം മിനുട്ടിൽ ബെൻസിമയുടെ അസിസ്റ്റിൽ നിന്ന് അസെൻസിയോ ഹാട്രിക് പൂർത്തിയാക്കി.78-ആം മിനുട്ടിൽ അലാബയുടെ അസിസ്റ്റിൽ നിന്ന് ബെൻസിമ റയലിന്റെ ഗോൾ നേട്ടം അഞ്ചാക്കി.84-ആം മിനുട്ടിൽ വിനീഷ്യസിന്റെ അസിസ്റ്റിൽ നിന്ന് ഇസ്ക്കോ കൂടി ഗോൾ നേടിയതോടെ ഗോൾപട്ടിക പൂർത്തിയാക്കി.