ഹസാർഡിന് വേണമെങ്കിൽ റയൽ വിടാം : സൂചനകളുമായി ആഞ്ചലോട്ടി!

ഇന്നലെ ലാലിഗയിൽ നടന്ന മത്സരത്തിൽ ഒന്നിനെതിരെ രണ്ടു ഗോളുകൾക്കായിരുന്നു റയൽ മാഡ്രിഡ്‌ എൽചെയെ പരാജയപ്പെടുത്തിയത്. മത്സരത്തിൽ ഇരട്ട ഗോളുകൾ നേടിയ വിനീഷ്യസ് ജൂനിയറായിരുന്നു റയലിന്റെ വിജയശില്പി.മത്സരത്തിൽ സൂപ്പർ താരം ഈഡൻ ഹസാർഡിന് ആദ്യഇലവനിൽ ഇടം നേടാൻ സാധിച്ചിരുന്നില്ല. മറിച്ച് റോഡ്രിഗോ, മരിയാനോ എന്നിവരൊക്കെ റയലിന്റെ മുന്നേറ്റനിരയിൽ അണിനിരന്നിരുന്നു.

ഏതായാലും ഈഡൻ ഹസാർഡിന്റെ കാര്യത്തിൽ മറ്റു സൂചനകൾ നൽകി കൊണ്ട് രംഗത്ത് വന്നിരിക്കുകയാണിപ്പോൾ ആഞ്ചലോട്ടി. അതായത് ഹസാർഡിന് വേണമെങ്കിൽ റയൽ വിടാം എന്ന രൂപേണയാണ് ആഞ്ചലോട്ടി സംസാരിച്ചത്. അദ്ദേഹത്തിന്റെ വാക്കുകൾ ഗോൾ ഡോട്ട് കോം റിപ്പോർട്ട്‌ ചെയ്യുന്നത് ഇങ്ങനെയാണ്.

” എന്റെ കോച്ചിംഗ് കരിയറിൽ, ക്ലബ് വിട്ട് പോവാൻ ആഗ്രഹിക്കുന്ന ഒരു താരത്തെയും നിർബന്ധപൂർവ്വം ഞാൻ ടീമിൽ പിടിച്ചു നിർത്തിയിട്ടില്ല.എന്റെ വ്യക്തിപരമായ അഭിപ്രായത്തിൽ എനിക്ക് അതേക്കുറിച്ച് സംശയങ്ങൾ ഒന്നുമില്ല ” ഇതാണ് ഹസാർഡിനെ കുറിച്ച് ആഞ്ചലോട്ടി പറഞ്ഞത്.

അതേസമയം വിനീഷ്യസിന് വിശ്രമങ്ങൾ അനുവദിക്കുമോ എന്നുള്ള കാര്യത്തിലും ആഞ്ചലോട്ടി തന്റെ നിലപാട് വ്യക്തമാക്കിയിട്ടുണ്ട്. ” വിനീഷ്യസിന് ഇപ്പോൾ കുഴപ്പമൊന്നുമില്ല.അദ്ദേഹം വളരെ യങ് ആണ്. അത്കൊണ്ട് ബാക്കിയുള്ളവരേക്കാൾ വേഗത്തിൽ അദ്ദേഹം റിക്കവർ ചെയ്യുന്നു. ഇനി വിനീഷ്യസിന് എന്തെങ്കിലും പ്രശ്നം ഉണ്ടായാൽ ഞങ്ങൾ അദ്ദേഹത്തിന് വിശ്രമം നൽകും.പക്ഷേ ഇപ്പോൾ ഞങ്ങൾ എല്ലാവരും ഹാപ്പിയാണ് ” ആഞ്ചലോട്ടി പറഞ്ഞു.

നിലവിൽ 24 പോയിന്റുള്ള റയൽ ഒന്നാം സ്ഥാനത്താണ്. അതേസമയം രണ്ടും മൂന്നും സ്ഥാനങ്ങളിൽ ഉള്ള സെവിയ്യക്കും റയൽ സോസിഡാഡിനും ഇതേ പോയിന്റുകൾ തന്നെയാണ്.