സൂപ്പർ താരത്തിന് പരിക്ക്, അടുത്ത തിരിച്ചടിയേറ്റ് റയൽ മാഡ്രിഡ്‌ !

ഇന്നലെ ലാലിഗയിൽ നടന്ന മത്സരത്തിൽ ഒന്നിനെതിരെ നാലു ഗോളുകൾക്കായിരുന്നു റയൽ മാഡ്രിഡ്‌ വലൻസിയയോട് തകർന്നടിഞ്ഞത്. മത്സരത്തിൽ സൂപ്പർ താരങ്ങളുടെ അഭാവം റയൽ മാഡ്രിഡിനെ നന്നായി ബാധിച്ചിരുന്നു. ഇപ്പോഴിതാ അതിന് പുറമേ മറ്റൊരു താരത്തിന്റെ കൂടി പരിക്ക് സ്ഥിരീകരിച്ചിരിക്കുകയാണ് റയൽ മാഡ്രിഡ്‌. മധ്യനിര താരം ഫെഡേ വാൽവെർദെക്കാണ് റയൽ പരിക്ക് സ്ഥിരീകരിച്ചത്. താരത്തിന്റെ വലതു കാലിനാണ് പരിക്കേറ്റിരിക്കുന്നത്.താരം എത്ര നാളുകൾ പുറത്തിരിക്കേണ്ടി വരുമെന്ന കാര്യം റയൽ വ്യക്തമാക്കിയിട്ടില്ല. പക്ഷെ രണ്ടാഴ്ച മുതൽ നാലാഴ്ച്ച വരെ താരത്തിന് വിശ്രമം വേണ്ടി വന്നേക്കുമെന്നാണ് റിപ്പോർട്ടുകൾ.

നിലവിൽ കോവിഡും പരിക്കും മൂലം നിരവധി താരങ്ങളെ പരിശീലകൻ സിദാന് നഷ്ടമായിട്ടുണ്ട്. ടീമിലെ നിർണായകതാരങ്ങളായ ഹസാർഡ്, കാസമിറോ,മിലിറ്റാവോ എന്നിവർക്ക്‌ കോവിഡ് സ്ഥിരീകരിച്ചതിനെ തുടർന്ന് വിശ്രമത്തിലാണ്. കൂടാതെ പ്രതിരോധനിരയിലെ ഡാനി കാർവഹാൽ, നാച്ചോ ഫെർണാണ്ടസ്, അൽവാരോ ഓഡ്രിയോസോള എന്നിവരും പരിക്കേറ്റ് പുറത്താണ്.ഏതായാലും ഈ ലിസ്റ്റിലേക്കാണിപ്പോൾ വാൽവെർദെയും ചേർന്നിരിക്കുന്നത്. ഏതായാലും ഇന്റർനാഷണൽ ബ്രേക്കിന് ശേഷമാണ് ഇനി റയലിന് മത്സരങ്ങളുള്ളത്. അപ്പോഴേക്കും താരങ്ങൾ തിരിച്ചെത്തുമെന്ന പ്രതീക്ഷയിലാണ് സിദാൻ.