വേണമെങ്കിൽ റയലിലേക്ക് പൊക്കോളൂ, ബാഴ്സയിലേക്ക് പോവരുത് ; ലൗറ്ററോക്ക് ഉപദേശവുമായി മുൻതാരം

ഇന്റർമിലാൻ സൂപ്പർ താരം ലൗറ്ററോ മാർട്ടിനെസിലെ ക്യാമ്പ് നൗവിലെത്തിക്കാൻ ബാഴ്സ ശ്രമങ്ങൾ തുടർന്നു കൊണ്ടിരിക്കുകയാണ്. താരത്തിന്റെ റിലീസ് ക്ലോസിന്റെ കാലാവധി ജൂലൈ ഏഴിന് അവസാനിക്കും മുൻപ് ഇന്ററുമായി കരാറിലെത്താനാണ് ബാഴ്സയുടെ ശ്രമങ്ങൾ. എന്നാൽ താരത്തോട് ബാഴ്‌സയിലേക്ക് പോവരുത് എന്ന ഉപദേശം നൽകിയിരിക്കുകയാണ് മുൻ ഇന്റർമിലാൻ താരവും നെതർലൻഡ് സൂപ്പർ താരവുമായ വെസ്ലി സ്‌നൈഡർ. മുൻ റയൽ താരം കൂടിയായ സ്‌നൈഡർ താരത്തോട് റയലിലേക്ക് പോവാനാണ് ആവിശ്യപ്പെട്ടിരിക്കുന്നത്.കഴിഞ്ഞ ദിവസം സ്പോർട്സ് മെയിലിന് നൽകിയ അഭിമുഖത്തിലാണ് സ്‌നൈഡർ ഇക്കാര്യം പറഞ്ഞത്. തനിക്ക് ബാഴ്സയെ ഇഷ്ടമല്ലെന്നും അത്കൊണ്ടാണ് റയലിന് വേണ്ടി കളിച്ചതെന്നും അദ്ദേഹം പറഞ്ഞു. താൻ കണ്ട ഏറ്റവും ടാലന്റഡ് ആയ താരം ഗൂട്ടിയാണെന്നും സ്‌നൈഡർ കൂട്ടിച്ചേർത്തു.

” എനിക്ക് ലൗറ്ററോക്ക് നൽകാനുള്ള ഉപദേശം എന്തെന്നാൽ താരം റയലിന് വേണ്ടി സൈൻ ചെയ്യണം എന്നാണ്. ശാരീരികപരമായും മാനസികപരമായും നല്ല കരുത്തനായ താരമാണ് ലൗറ്ററോ. അദ്ദേഹം തീർച്ചയായും റയലിൽ എത്തിച്ചേരാൻ വേണ്ടി ശ്രമിക്കണം. ബാഴ്സയിലേക്കല്ല. പക്ഷെ ഉടനെ തന്നെ അദ്ദേഹം റയലിലേക്ക് പോവേണ്ട ആവിശ്യമില്ല. ഇന്റർമിലാന് വേണ്ടി ഒത്തിരി കാലം കളിച്ചതിന് ശേഷം റയലിന് വേണ്ടി ശ്രമിക്കട്ടെ ” വെസ്ലി സ്‌നൈഡർ പറഞ്ഞു. രണ്ട് ദിവസങ്ങൾക്ക് മുൻപ് രസകരമായ പ്രസ്താവന കൊണ്ടും സ്‌നൈഡർ വാർത്തകളിൽ ഇടംനേടിയിരുന്നു. തനിക്ക് മെസ്സിക്കും ക്രിസ്റ്റ്യാനോക്കും ഒപ്പമെത്താൻ കഴിയുമായിരുന്നു എന്നും എന്നാൽ താൻ ജീവിതം ആസ്വദിച്ചത് കൊണ്ട് അതിന് സാധിച്ചില്ല എന്നുമായിരുന്നു അദ്ദേഹത്തിന്റെ പ്രസ്താവന.