റയലിന്റെ രക്ഷകനായി വിനീഷ്യസ്, ഡിബാല തിളങ്ങിയിട്ടും യുവന്റസിന് സമനില!

ഇന്നലെ ലാലിഗയിൽ നടന്ന മത്സരത്തിൽ കരുത്തരായ റയൽ മാഡ്രിഡിന് സമനില. ലെവാന്റെയാണ് റയലിനെ 3-3 എന്ന സ്കോറിന് സമനിലയിൽ തളച്ചത്. രണ്ട് തവണ പിന്നിൽ നിന്നപ്പോഴും ഗോളുകൾ നേടിക്കൊണ്ട് സമനിലയിലേക്ക് എത്തിച്ച ബ്രസീലിയൻ താരം വിനീഷ്യസ് ജൂനിയറാണ് റയലിന്റെ രക്ഷകൻ.ശേഷിച്ച ഗോൾ ഗാരെത് ബെയ്‌ലാണ് നേടിയത്. മത്സരത്തിന്റെ അഞ്ചാം മിനുട്ടിൽ ബെൻസിമയുടെ അസിസ്റ്റിൽ നിന്ന് ബെയ്ൽ വല കുലുക്കുകയായിരുന്നു.എന്നാൽ 46-ആം മിനുട്ടിൽ റോജർ സമനില ഗോൾ നേടി.പത്ത് മിനുട്ടുകൾക്ക്‌ ശേഷം കമ്പാന ഗോൾ നേടിക്കൊണ്ട് ലെവാന്റെയെ മുന്നിലെത്തിച്ചു.എന്നാൽ 73-ആം മിനുട്ടിൽ കാസമിറോയുടെ അസിസ്റ്റിൽ നിന്ന് ഗോൾ നേടിക്കൊണ്ട് വിനീഷ്യസ് റയലിന് സമനില നേടിക്കൊടുത്തു.79-ആം മിനുട്ടിൽ റോബർഗോൾ നേടിയതിലൂടെ റയൽ വീണ്ടും പിന്നിലായി.എന്നാൽ 85-ആം മിനുട്ടിൽ ബെൻസിമയുടെ അസിസ്റ്റിൽ നിന്ന് വിനീഷ്യസ് ഗോൾ നേടിക്കൊണ്ട് റയലിന് സമനില നേടികൊടുക്കുകയായിരുന്നു.ഇതോടെ പോയിന്റ് ടേബിളിൽ നാല് പോയിന്റുമായി റയൽ രണ്ടാം സ്ഥാനത്താണ്. ആറ് പോയിന്റുള്ള അത്ലറ്റിക്കോയാണ് ഒന്നാം സ്ഥാനത്ത്.

അതേസമയം സിരി എയിൽ നടന്ന ആദ്യമത്സരത്തിൽ യുവന്റസിന് സമനില. ഉഡിനസാണ് യുവന്റസിനെ 2-2 എന്ന സ്കോറിന് സമനിലയിൽ കുരുക്കിയത്.യുവന്റസിന് വേണ്ടി ഒരു ഗോളും ഒരു അസിസ്റ്റുമായി പൌലോ ഡിബാല തിളങ്ങുകയായിരുന്നു.എന്നാൽ രണ്ടാം പകുതിയിൽ രണ്ട് ഗോളുകൾ നേടിക്കൊണ്ട് ഉഡിനസ് തിരിച്ചു വരികയായിരുന്നു. പകരക്കാരനായി ഇറങ്ങി കൊണ്ട് ക്രിസ്റ്റ്യാനോ ഗോൾ നേടിയെങ്കിലും ഓഫ്‌ വിധിക്കുകയായിരുന്നു.