റയലിനെ തകർത്തെറിഞ്ഞ് ബാഴ്‌സ; ലാ ലിഗ കിരീടം ഇനി ബാഴ്സയുടെ കരങ്ങളിൽ….!

     സ്പാനിഷ് ഫുട്ബോളിലെ രാജാക്കന്മാർ ആരെന്ന തർക്കത്തിന് വിരാമം. ചിരവൈരികളായ റയൽ മാഡ്രിഡിനെ 2-0 ക്ക് തകർത്തെറിഞ്ഞ് കൊണ്ട് എഫ്.സി ബാഴ്‌സലോണ 2025-26 സീസണിലെ ലാ ലിഗ കിരീടത്തിൽ മുത്തമിട്ടു. നിർണ്ണായകമായ ‘എൽ ക്ലാസിക്കോ’ പോരാട്ടത്തിൽ റയലിന്റെ പ്രതിരോധ കോട്ടകൾ തകർത്ത ബാഴ്‌സ, ഏകപക്ഷീയമായ വിജയത്തോടെയാണ് കിരീടം ഉറപ്പിച്ചത്.
കളിയിലുടനീളം പന്തടക്കത്തിലും ആക്രമണത്തിലും മികച്ചുനിന്ന ബാഴ്‌സലോണയ്ക്ക് വേണ്ടി മുന്നേറ്റനിര താരങ്ങൾ തകർപ്പൻ പ്രകടനമാണ് കാഴ്ചവെച്ചത്. മധ്യനിരയിലെ തന്ത്രപരമായ നീക്കങ്ങളും പ്രതിരോധത്തിലെ വിള്ളലില്ലാത്ത കരുത്തും റയൽ മാഡ്രിഡിനെ നിഷ്പ്രഭരാക്കി. സ്വന്തം തട്ടകത്തിൽ പൊരുതി നോക്കിയെങ്കിലും ബാഴ്‌സയുടെ ആക്രമണ ഫുട്ബോളിന് മുന്നിൽ റയൽ പതറുകയായിരുന്നു.



    റയലിൽ ജയം അനിവാര്യമായിരുന്ന മത്സരത്തിൽ ഒമ്പതാം മിനിറ്റിൽ തന്നെ ബാഴ്സ മുന്നിലെത്തി. അന്റോണിയോ റോഡിഗറിന്റെ ഫൗളിന് ലഭിച്ച ഫ്രീ കിക്ക് മാർക്കസ് ബോർഡ് , തിബോ കോർട്ടോയയുടെ വലയുടെ മുകളിലെ മൂലയിലേക്ക് വളച്ചു കയറ്റി. പതിനെട്ടാം മിനിറ്റിൽ ലീഡ് ഇരട്ടിയായി.ഫെർമിൻ ലോപ്പസിന്റെ ക്രോസ്സിൽ, ഡാനി ഓൾമോയുടെ ബാക് ഹീലിലൂടെ പന്ത് ലഭിച്ച ഫെറാൻ ടോറസ്  ശക്തമായ ഷോട്ടിലൂടെ വകവരുത്തി.



    ഈ ജയത്തോടെ ബാഴ്സ 35 കളികളിൽ 91 പോയിന്റുമായി രണ്ടാമതുള്ള റയലിനേക്കാൾ 14 പോയിൻറ് മുന്നിലെത്തി.സീസണിലെ മൂന്നു മത്സരങ്ങൾ ബാക്കി നിൽക്കുകയാണ് കിരീടം ഉറപ്പിച്ചത്. ഹാൻസി ഫ്ളിക്കിന്റെ കീഴിൽ തുടർച്ചയായ രണ്ടാം ലീഗ് കിരീടമാണിത്.
ഈ വിജയം ബാഴ്‌സലോണ ആരാധകർക്ക് ഇരട്ടി മധുരമാണ് നൽകുന്നത്. സീസണിന്റെ തുടക്കം മുതൽ പുലർത്തിയ സ്ഥിരതയാർന്ന പ്രകടനം ഈ കിരീടനേട്ടത്തോടെ പൂർണ്ണമായിരിക്കുകയാണ്. തോൽവിയോടെ റയൽ മാഡ്രിഡിന് രണ്ടാം സ്ഥാനത്തേക്ക് തൃപ്തിപ്പെടേണ്ടി വന്നു. കാറ്റലോണിയൻ തെരുവുകളിൽ ഇപ്പോൾ ആഘോഷരാവാണ്. ബാഴ്‌സയുടെ ഈ തിരിച്ചുവരവ് യൂറോപ്യൻ ഫുട്ബോളിൽ തങ്ങളുടെ പഴയ പ്രതാപം വീണ്ടെടുക്കുന്നതിന്റെ സൂചന കൂടിയാണ്.