മെസ്സി-റൊണാൾഡോ റിവൽറിയുടെ പ്രത്യേകതകൾ എന്തൊക്കെയാണെന്ന് പറഞ്ഞ് എംബപ്പേ!

കഴിഞ്ഞ പത്ത് പതിനഞ്ച് വർഷത്തോളമായി ഫുട്ബോൾ ലോകം അടക്കി ഭരിച്ചുകൊണ്ടിരിക്കുന്ന ഇതിഹാസങ്ങളാണ് ലയണൽ മെസ്സിയും ക്രിസ്റ്റ്യാനോ റൊണാൾഡോയും.ലോകത്തിലെ ഏറ്റവും മികച്ച താരത്തിനുള്ള ബാലൺ ഡിയോർ പുരസ്കാരം മെസ്സി ഏഴ് തവണ നേടിയപ്പോൾ റൊണാൾഡോ അഞ്ച് തവണ നേടിയിട്ടുമുണ്ട്. ലോകമെമ്പാടും നിരവധി ആരാധകരെ സൃഷ്ടിക്കാൻ ഈ രണ്ടു താരങ്ങൾക്കും കഴിഞ്ഞിട്ടുണ്ട്. ഇത്രയും വലിയ ഒരു റിവൽറിക്ക് ലോക ഫുട്ബോൾ ഇന്നേവരെ സാക്ഷ്യം വഹിച്ചിട്ടില്ല എന്നുള്ളത് നിസ്സംശയം പറയാൻ കഴിയും.

ഏതായാലും ഇരുവരും തമ്മിലുള്ള റിവൽറിയുടെ പ്രത്യേകതകൾ എന്തൊക്കെയാണ് എന്നുള്ളത് പിഎസ്ജി സൂപ്പർതാരമായ കിലിയൻ എംബപ്പേ ഇപ്പോൾ തുറന്നു പറഞ്ഞിട്ടുണ്ട്. ഫുട്ബോളിനോടുള്ള ആളുകളുടെ സമീപനം തന്നെ മാറ്റിമറിക്കാൻ ഇരുവർക്കും കഴിഞ്ഞുവെന്നാണ് എംബപ്പേ പറഞ്ഞിട്ടുള്ളത്. പല്ലും നഖവും ഉപയോഗിച്ചാണ് അഥവാ സർവ്വശക്തിയുമെടുത്ത് പോരാടി കൊണ്ടാണ് ഒരു ദശാബ്ദത്തോളം ഇരുവരും ഭരിച്ചതെന്നും എംബപ്പേ കൂട്ടിച്ചേർത്തിട്ടുണ്ട്.അദ്ദേഹത്തിന്റെ വാക്കുകളെ വാൾ സ്ട്രീറ്റ് ജേണൽ റിപ്പോർട്ട് ചെയ്യുന്നത് ഇങ്ങനെയാണ്.

” ആളുകൾ ഈ മത്സരത്തെ സമീപിക്കുന്ന രീതിയിൽ തന്നെ അവർ മാറ്റിമറിച്ചു. എനിക്ക് തോന്നുന്നത് അതുകൊണ്ടാണ് ആളുകൾ എല്ലാവരും ഈ രണ്ടുപേരുടെയും റിവൽറിയിൽ ആകർഷരായിരിക്കുന്നത്. അവർ ഫുട്ബോളിനെ ഒരു രീതിയിലല്ല കാണുന്നത്. അവർ ജീവിതത്തെ ഒരേ രീതിയിലല്ല കാണുന്നത്. ഒരു ദശാബ്ദത്തോളമാണ് അവർ പല്ലും നഖം ഉപയോഗിച്ച് പോരാടി ഭരിച്ചത്. എന്നെ സംബന്ധിച്ചിടത്തോളം എന്റെ കുട്ടിക്കാലം മുഴുവനും അവർ ഭരിച്ചു ” ഇതാണ് എംബപ്പേ പറഞ്ഞിട്ടുള്ളത്.

ചെറുപ്പം തൊട്ടേ സൂപ്പർതാരം ക്രിസ്റ്റ്യാനോ റൊണാൾഡോയുടെ വലിയ ആരാധകനാണ് കിലിയൻ എംബപ്പേ. എന്നാൽ നിലവിൽ താരം കളിച്ചു കൊണ്ടിരിക്കുന്നത് ലയണൽ മെസ്സിക്കൊപ്പമാണ്.