മെസ്സി ഗോൾകീപ്പർമാരുടെയും ഡിഫൻഡർമാരുടെയും ഘാതകൻ, അർജന്റൈൻ ഗോൾകീപ്പർ പറയുന്നു!

നിലവിൽ ചെൽസിയുടെ ഗോൾകീപ്പറായ വില്ലി കബല്ലേറോ മെസ്സിക്കൊപ്പം അർജന്റൈൻ ടീമിൽ കളിച്ച താരമാണ്. എന്നാൽ ക്ലബ്ബിൽ ഇരുവരും ഒട്ടേറെ തവണ പരസ്പരം മുഖാമുഖം വന്നിട്ടുണ്ട്. ലാലിഗ ക്ലബുകളായ എൽചെ, മലാഗ എന്നിവർക്ക് വേണ്ടി ഗോൾവല കാത്ത താരമാണ് കബല്ലേറോ. ഇപ്പോഴിതാ മെസ്സിയെ പറ്റി മനസ്സ് തുറന്നിരിക്കുകയാണ് കബല്ലേറോ.ഗോൾകീപ്പർമാരുടെയും ഡിഫൻഡർമാരുടെയും ഘാതകനാണ് എന്നാണ് മെസ്സിയെ ഇദ്ദേഹം വിശേഷിപ്പിച്ചത്.അദ്ദേഹത്തിന് സാധ്യമായത്ര ഗോളുകൾ നേടും എന്നാണ് ഈയൊരു വിശേഷണം കൊണ്ട് കബല്ലേറോ ഉദ്ദേശിച്ചത്.

“മെസ്സിയെ അഭിമുഖീകരിക്കുക എന്നുള്ളത് ബുദ്ധിമുട്ടേറിയ കാര്യമാണ്.അദ്ദേഹം ഗോൾകീപ്പർമാരെ കൊല്ലാകൊല ചെയ്യും.ഗോൾകീപ്പർമാരുടെയും ഡിഫൻഡർമാരുടെയും ഘാതകനാണ് അദ്ദേഹം.അതിനർത്ഥം സാധ്യമായ അത്രയും ഗോളുകൾ അദ്ദേഹം നേടുമെന്നാണ്.നിങ്ങളെ അദ്ദേഹത്തിന് അറിയുമെന്നുള്ളത് അദ്ദേഹം കണക്കിലെടുക്കുക പോലുമില്ല.നിങ്ങൾ ഒരു അർജന്റീനക്കാരനോ, അദ്ദേഹത്തിന്റെ സുഹൃത്തോ ആയാലും ശരി, കളിക്കളത്തിൽ അദ്ദേഹം അത്‌ വകവെക്കില്ല.മത്സരത്തിന് ശേഷം മെസ്സി നിങ്ങളോട് സംസാരിക്കുകയും ആശംസകൾ നേരുകയും ചെയ്യും. എന്നാൽ ആ 90 മിനുട്ട് അദ്ദേഹത്തിന്റെ ലക്ഷ്യം ഗോളുകൾ നേടുക എന്നത് മാത്രമായിരിക്കും ” കബല്ലേറോ പറഞ്ഞു.