മെസ്സിയുടെ പിഎസ്ജിയിലേക്കുള്ള പോക്ക്, ഇനിയേസ്റ്റ പ്രതികരിച്ചത് ഇങ്ങനെ!

സൂപ്പർ താരം ലയണൽ മെസ്സിയെ തങ്ങൾ സ്വന്തമാക്കിയ കാര്യം പിഎസ്ജി ഇന്നലെയാണ് ഔദ്യോഗികമായി അറിയിച്ചത്. രണ്ട് വർഷത്തെ കരാറിലാണ് മെസ്സി ഒപ്പ് വെച്ചിരിക്കുന്നത്. മുപ്പതാം നമ്പർ ജേഴ്സിയാണ് മെസ്സി അണിയുന്നതെന്നും സ്ഥിരീകരിച്ചിട്ടുണ്ട്. വലിയ ആവേശത്തോടെയാണ് പിഎസ്ജി ആരാധകർ മെസ്സിയെ വരവേറ്റത്. എന്നാൽ ബാഴ്‌സ ആരാധകരെ സംബന്ധിച്ചിടത്തോളം ഇതൊരു വേദനാജനകമായ നീക്കമാണ്. ഇത്‌ തന്നെയാണ് മുൻ ബാഴ്‌സ ഇതിഹാസമായ ആൻഡ്രസ് ഇനിയേസ്റ്റയും തുറന്ന് പറഞ്ഞിട്ടുള്ളത്. മെസ്സിയെ മറ്റൊരു ജേഴ്സിയിൽ കാണുന്നത് വേദന ഉളവാക്കുന്ന കാര്യമാണ് എന്നാണ് ഇനിയേസ്റ്റ അറിയിച്ചിട്ടുള്ളത്.കഴിഞ്ഞ ദിവസം എഎഫ്പി എന്ന മാധ്യമത്തോട് സംസാരിക്കുകയായിരുന്നു മെസ്സിയുടെ മുൻ സഹതാരം കൂടിയായ ഇനിയേസ്റ്റ.

” ക്ലബ്ബിൽ ആഭ്യന്തരമായി എന്താണ് സംഭവിച്ചതെന്നോ, അല്ലെങ്കിൽ കാര്യങ്ങൾ ഈ സ്ഥിതിയിലേക്ക് എത്തിയത് എങ്ങനെയാണെന്നോ എനിക്കറിയില്ല.പക്ഷേ ഈയൊരു ട്രാൻസ്ഫറിൽ നിന്നും ക്ലബ് മുക്തരാവേണ്ടതുണ്ട്.മറ്റൊരു ടീമിന്റെ ജേഴ്സിയിൽ അദ്ദേഹത്തെ കാണുന്നത് വേദന ഉളവാക്കുന്ന കാര്യമാണ്.അദ്ദേഹം എല്ലാമായിരുന്നു.ടീമിനെ ഉയരങ്ങളിലേക്ക് എത്തിച്ച താരമാണ് അദ്ദേഹം.അദ്ദേഹത്തെ പോലെയൊരു താരത്തെ ഞാൻ ഇത്‌ വരെ കണ്ടിട്ടില്ല. ഇനി കാണുമെന്ന് തോന്നുന്നുമില്ല.ലോകത്തിലെ ഏറ്റവും മികച്ച ടീമുകളിൽ ഒന്നായി ബാഴ്‌സ തുടരുക തന്നെ ചെയ്യും.അതിൽ സംശയങ്ങളൊന്നുമില്ല ” ഇനിയേസ്റ്റ പറഞ്ഞു.