മെസ്സിക്കും സുവാരസിനും ആസ്പാസിന്റെ മറുപടി, വീണ്ടും പോയിന്റ് നഷ്ടപ്പെടുത്തി ബാഴ്സ

ഉദ്വേഗജനകമായ രംഗങ്ങൾക്കൊടുവിൽ ലാലിഗയിൽ ഒരു സമനില കൂടി വഴങ്ങി ബാഴ്സ. ഇന്ന് നടന്ന മത്സരത്തിൽ സെൽറ്റ വിഗോയാണ് ബാഴ്സയെ സമനിലയിൽ തളച്ചത്. സെൽറ്റ വിഗോയുടെ മൈതാനത്ത് വെച്ച് നടന്ന മത്സരത്തിൽ ഓരോ തവണയും പിന്നിൽ നിന്ന് തിരിച്ചടിച്ചാണ് സെൽറ്റ വിഗോ സമനില പിടിച്ചത്. 2-2 എന്ന സ്കോറിനാണ് നിർണായകമത്സരത്തിൽ ബാഴ്സ വീണ്ടും സമനില വഴങ്ങിയത്. ബാഴ്സക്ക് വേണ്ടി സുവാരസ് ഇരട്ടഗോളുകൾ നേടിയപ്പോൾ സ്‌മോളോവ്, ആസ്‌പാസ്‌ എന്നിവരാണ് സെൽറ്റ വിഗോയുടെ ഗോളുകൾ നേടിയത്. ഇരട്ടഅസിസ്റ്റുകൾ നേടിയ മെസ്സിയും തിളങ്ങി. ഇതോടെ പോയിന്റ് പട്ടികയിൽ റയലുമായുള്ള ലീഡ് ഒന്നാക്കി ഉയർത്താനെ ബാഴ്സക്ക് കഴിഞ്ഞൊള്ളൂ. അടുത്ത മത്സരത്തിൽ റയൽ വിജയിച്ചാൽ ബാഴ്സയെ രണ്ട് പോയിന്റുകൾക്ക് പിന്തള്ളി ഒന്നാം സ്ഥാനം കരസ്ഥമാക്കാൻ റയലിന് സാധിക്കും.

മെസ്സി, സുവാരസ്, ഫാറ്റി, പ്യുഗ് എന്നിവരെല്ലാം അണിനിരന്നു കൊണ്ടാണ് ബാഴ്സ കളത്തിലേക്ക് ഇറങ്ങിയത്. മത്സരത്തിന്റെ ഇരുപതാം മിനുട്ടിലാണ് ബാഴ്സയുടെ ആദ്യഗോൾ പിറന്നത്. മെസ്സിയെടുത്ത ഫ്രീകിക്ക് ഒരു ഹെഡറിലൂടെ സുവാരസ് സെൽറ്റ വിഗോയുടെ വലയിലേക്ക് എത്തിക്കുകയായിരുന്നു. ഈ ഗോളിന്റെ ലീഡിൽ ബാഴ്സ ആദ്യപകുതി അവസാനിപ്പിച്ചു. എന്നാൽ രണ്ടാം പകുതിയുടെ തുടക്കത്തിൽ തന്നെ സെൽറ്റ വിഗോ സമനില നേടി. ഒരു കൌണ്ടർ അറ്റാക്കിനൊടുവിൽ യോകുസ്ലുവിന്റെ പാസിൽ നിന്ന് സ്‌മോളോവ് വലകുലുക്കുകയായിരുന്നു.

എന്നാൽ വീണ്ടും മെസ്സി-സുവാരസ് സഖ്യം ബാഴ്സക്ക് ലീഡ് നേടിക്കൊടുത്തു. 67-ആം മിനുട്ടിൽ മെസ്സിയുടെ പാസ്സ് ഞൊടിയിടയിൽ തൊടുത്ത ഷോട്ടിലൂടെ സുവാരസ് വലയിലെത്തിച്ചു. ഈ ഗോളിന്റെ ബലത്തിൽ ബാഴ്സ വിജയത്തിലേക്ക് കുതിക്കവേ ഇടിത്തീ പോലെയാണ് ആസ്പാസിന്റെ ഗോൾ വന്നത്. മത്സരത്തിന്റെ എൺപത്തിയെട്ടാം മിനിറ്റിൽ ബോക്സിന് തൊട്ട് വെളിയിൽ നിന്ന് ലഭിച്ച ഫ്രീകിക്ക് അതിമനോഹരമായി ആസ്‌പാസ്‌ വലയിലെത്തിക്കുകയായിരുന്നു. ബാഴ്സ ഗോൾ കീപ്പർ ടെർസ്റ്റീഗൻ ഒന്നും ചെയ്യാനാവാതെ നിസ്സഹായനായി പോവുകയായിരുന്നു. ഒടുക്കം മത്സരം അവസാനിക്കുമ്പോൾ സ്കോർ ബോർഡ് 2-2 ൽ തന്നെ തുടരുകയായിരുന്നു.