മാഴ്സെലോയേയും ഡാനി ആൽവസിനെയും ഒരുമിച്ച് ടീമിലെത്തിക്കാൻ റൊണാൾഡോ!

ബ്രസീലിയൻ സൂപ്പർ താരങ്ങളായ മാഴ്സെലോയും ഡാനി ആൽവസും നിലവിൽ പുതിയൊരു ക്ലബ്ബിന് വേണ്ടിയുള്ള അന്വേഷണത്തിലാണ്.രണ്ട് താരങ്ങളും ഫ്രീ ഏജന്റുമാരാണ്.തന്റെ ബാഴ്സയിലേക്കുള്ള രണ്ടാം വരവിൽ കേവലം 7 മാസങ്ങൾ മാത്രമാണ് ആൽവസിന് ചിലവഴിക്കാൻ സാധിച്ചിട്ടുള്ളത്.ബാഴ്സ കരാർ പുതുക്കാൻ വിസമ്മതിച്ചതോടെ ഡാനി ക്ലബ്ബിനോട് വിട ചൊല്ലിയിരുന്നു.

അതേസമയം റയൽമാഡ്രിഡ് ഇതിഹാസമായ മാഴ്സെലോയും ക്ലബ്ബിനോട് വിട പറഞ്ഞിരുന്നു.താരത്തിന്റെ കരാർ പുതുക്കുന്നില്ല എന്നുള്ള കാര്യം നേരത്തെ തന്നെ റയൽ അറിയിച്ചിരുന്നു. നിലവിൽ എസി മിലാൻ,മാഴ്സെ,ഫെനർബാഷെ എന്നിവർ മാഴ്സെലോക്ക് വേണ്ടി രംഗത്തുണ്ട്.യൂറോപ്പിൽ തന്നെ തുടരാനാണ് മാഴ്സെലോയും ഡാനി ആൽവസും ആഗ്രഹിക്കുന്നത്.

ഇപ്പോഴിതാ ഇരു താരങ്ങളെയും ഒരുമിച്ച് തന്റെ ടീമിലേക്ക് എത്തിക്കാനുള്ള ഒരുക്കത്തിലാണ് നിലവിൽ ബ്രസീലിയൻ ഇതിഹാസമായ റൊണാൾഡോ നസാരിയോയുള്ളത്. റൊണാൾഡോയുടെ ഉടമസ്ഥതയിലുള്ള ലാലിഗ ക്ലബായ റയൽ വല്ലഡോലിഡാണ് ഇരുവരെയും സ്വന്തമാക്കാനുള്ള ശ്രമങ്ങൾക്ക് ആരംഭം കുറിച്ചിരിക്കുന്നത്. ഇരുവരുമായുള്ള റൊണാൾഡോയുടെ അടുത്ത ബന്ധം ഇതിന് ഗുണകരമാകുമെന്നാണ് പ്രതീക്ഷിക്കപ്പെടുന്നത്. ബ്രസീലിയൻ മാധ്യമമായ UOL ആണ് ഇക്കാര്യം റിപ്പോർട്ട് ചെയ്തിരിക്കുന്നത്.

വരുന്ന സീസണിൽ ലാലിഗയിലേക്ക് പ്രമോട്ട് ചെയ്യപ്പെട്ട ടീമാണ് വല്ലഡോലിഡ്. ഇരു താരങ്ങളുടെയും സാലറി ക്ലബ്ബിനെ സംബന്ധിച്ചിടത്തോളം വിഷയമില്ല. മാത്രമല്ല ട്രാൻസ്ഫർ ഫീ ഇല്ലാത്തതിനാൽ കാര്യങ്ങൾ വേഗത്തിലാകുമെന്നാണ് പ്രതീക്ഷിക്കപ്പെടുന്നത്. ഏതായാലും ഇരുവരും ടീമിൽ എത്തിക്കഴിഞ്ഞാൽ ഇരു താരങ്ങളുടെയും പരിചയ സമ്പന്നത വല്ലഡോലിഡിന് ഗുണകരമാവുമെന്നുള്ള കാര്യത്തിൽ സംശയമില്ല.